Орс келн Әрәсән улсиг хамцулҗана

Сегодня, 13:36 | Общество, Таңһчин зәңгс, Зіњг

Давсн үлмҗ өдр «Калмыкия» РИА-н барин төвд орс сойлын ик хургт нерәдсн брифинг болв.
«Хамцу уңг-үндсн – негдсн хөв-кишг» гиҗ ик кемҗәтә эн керг-үүлдвр нерәдгдҗәнә. Терүнә көтлврин тускар брифингд орлцсн Әрәсән келн-улсин Ассамблейин Хальмг Таңһчин әңгин ахлач Бембин Евгений, ассамблейин баһчудын әңгин элч Мөңкән Данир, «Хальмг Таңһчин корей улсин негдлт» гидг РОО-н һардач Улана Наталья, орс дууна «Степняночка» ансамбльд улсин орлцач Анна Чербаева-Иванова тодрхаһар зәңглв. Эн ик хургин нилчәр келн-улсин хоорндк ниицлт цааранднь батрҗ, теднә хәрлцән өргҗәд келн-улсин авъяс делгрҗ хадһлгдх зөвтә гиҗ брифингд орлцачнр темдглв.
Ик хург Элстд славян улсин бичмрин болн сойлын Өдрлә, хөн сарин 24-д 11 часла эклх. Тер кемд Амр-Санана нертә дегтрин саңгин улд номтнр болн шинҗләчнр орс келнә болн терүнә бичмрин тууҗин, эндрк бәәдлин тускар келҗ өгх. Асхлад 17 часла Элстин 7-ч микрорайона Диилврин паркд иньгллтин концерт болхмн. Энд таңһчин үүдәгч коллективс билг-эрдмән үзүлх, тер тоод «Степняночка» ансамбль орс ду дуулх. Тер мет Тамбовин мүҗин делегацин ханьд орсн «Берегиня» ансамблин артистнр концертд орлцх гиҗ күләгдҗәнә. Гиичнрин төлә хальмг бичмрин болн олн улсин наадд дасхдг талвңгуд бүрдәгдх. Тиигҗ Тамбовин муҗин болн Хальмг Таңһчин сойлын нөкцлт Элстд эклцән авч, цааранднь делгрҗ келн-улсин иньгллтд туслхнь лавта.

ТҮРВӘН Һуна

Видео