Москван мергҗлтнр дамшлтарн хувалцв

Сегодня, 11:20 | Общество, Таңһчин зәңгс, Зіњг

Әрәсән эрүл-менд харлһна Министерствин зүркнә-судцна хирургийин келн-улсин медицинск шинҗллтин А.Н.Бакулевин нертә төвин мергҗлтнр мана таңһчд җил болһн ирәд, бәәрн улст дөң-нөкд болна.

Сүл тавн җилин эргцд эдн зүркнә-судцна гемтә улсин эрүл-мендин бәәдл шинҗләд, өөдән чинртә медицинск дөң кергтәһинь йилһҗ авад, төвин улд месллһ кесмн. Орн-нутгин нүүрлгч төвин болн П.Жемчуевин нертә таңһчин эмнлһнә эмчнр хоорнд бат залһлдан батрҗ, нөкцлт делгрәд бәәхнь лавта. Шидр зүркнә-судцна хирургийин төвин мергҗлтнр дәкн мана тал ирәд, ут тоодан 250 кү хәләҗ, дөңгән күргв. Эмчнрт бийән үзүлхәр ирсн улс дунд одахн гилтә Москвад месллһ кесн улс бас билә. Эдн месллһнә хөөн эрүл-мендин бәәдлән батрулҗана.
- Бидн тавн җилдән ирҗәнәвидн. Зәрмдән җилд хойр дәкҗ чигн ирх арһ учрна, тегәд мана төвд эмнлһ авсн улсин то өсәд йовна. Йириндән мана төвд эмнлһ авсн улсин ик зунь регионмудас ирсн болна. Эднд эрк биш медицинск даатхлһна халхар өөдән чинртә туслмҗ өңгәр күрггднә. Регионмудар һарч йовад, зүркнә гемтә улсиг илдкҗ авад, мана төвд хөөннь месллһ кенәвидн. Дәкәд иим улсин эрүл-мендин бәәдл шинҗлҗ, эмнлһнә йовудыг бүрткнәвидн. Келхд, таңһчин эмнлһнә зүркнә-судцна төвд коронарографийин туст күрггднә. Бидн эн җилмүдин эргцд Хальмгин эмчнрлә сән залһлда батрулвидн, тегәд өөдән чинртә дөң кергтә болхла бидн дөң-нөкд болнавидн, - гиҗ А.Н.Бакулевин нертә төвин һардачин дарук, зүркнә-судцна хирург, медицинск номин доктор Владимир Мироненко келнә.
Москваһас ирсн мергҗлтнрин багд мана нег һазра хирург Бадмин Церн бас ирснь темдгтә. Эн А.Бакулевин нертә нүүрлгч төвд көдлҗәнә, өөдән чинртә месллһ кедг мергҗлт мөн. Келхд, Бадмин Церн хальмгудас түрүн болҗ, зүркнә-судцна хирургийин халхар номин кандидатын цол зүүсмн. Орн-нутгин төвд хамдан көдлҗәдг үүрмүднь энүг өөдән мергҗлттә, ик дааврта, гемтә улст нөкд болхар зүткдг эмч, гиҗ буульмҗтаһар келв. «Ик дамшлтта эмчнрлә көдлхд нанд ик дааврта болна. Нег һазра улст дөң-нөкд болх арһ учрснд байрлҗанав, күн болһнд килмҗән тусхаҗ эрүл-мендин бәәдлинь шинҗлхвидн. Мана төвд эмнлһ авад, өөдән чинртә месллһнә хөөн эрүл-мендән батрулсн улсла харһад бахтнав», - гиҗ Бадмин Церн келв.
Эмчнрт бийән үзүлхәр ирсн улс орн-нутгин шинҗллтин төвин мергҗлтнр ирснд ханлтан өргҗ, керг-үүлдвр сәәнәр бүрдәгдсиг темдглв. Москваһас ирсн эмчнр өөдән чинртә эмнлһн керглгдҗәдг улст нөкд болсн деерән таңһчин үүрмүдләрн дамшлтарн хувалцв. Эдн бәәрн эмчнрлә харһад, зүркнә-судцна гемтә улсиг эмнлһнд олзлгддг өдгә цага эв-арһсин тускар цәәлһәд, таңһчд кардиологическ цергллт делгрүллһнд туслх сүв-селвгән өгв.
- Регионмудын мергҗлтнрлә бат залһлда бәрҗ, эмнлһнә керг-үүлдврмүдиг хамдан күцәхлә гемтә улс дарунь чинртә дөң авч чадхмн. Таңһчд үүлддг зүркнә-судцна төв сән чинртә дөң күргҗ, кардиохирургийин халхар месллһн кергтә болҗадг улсиг дарунь шишлң төвд йовулх зөвтә, - гиҗ Владимир Мироненко темдглв.

ДООҖАН Наталья
ЗУРГТ: таңһчин әмтн
зүркнә-судцна хирургийин А.Н.Бакулевин нертә төвин
мергҗлтнрт бийән үзүлсн кем

Видео