Дааврта көдлмш күцәхин төлә

Сегодня, 11:25 | Общество, Таңһчин зәңгс, Зіњг

Эн долан хонгт Хальмг ик сурһульд «Баатрмуд-08» көтлврин 4-ч девсңгин кичәлмүд болҗана. Цергә шишлң керг-үүлдврин ветеранмуд экономикин салвриг заллһна халхар медрлән цааранднь гүүдүлҗ, хальмг ик сурһулин багшнрин болн профессормудын лекцст болн семинармудт орлцҗана.
«Бидн эндр дарани девсңгин көдлмшән эклҗәнәвидн. Тадн бәәдл-җирһлин баһ биш дамшлт хоршасн улс болҗанат, таднд ода чинртә үүлдвр күцәх керг даалһгдҗана. Таңһчин залврин гешүд таднла дамшлтарн хувалцҗ залврин нүүрлгч эв-арһсин тускар келҗ өглә.
Ода тадн эврә төсвән үүдәҗ, эврә дамшлтан, хоршасн медрлән үзүлх зөвтәт. Тана багшнрла, сурһмҗлгчнрла хамдан таңһчин делгрлтд тустлх төсв үүдәҗ, залврин халхар кесг эв-арһ хоршасан үзүлҗ чадҗанат», - гиҗ хальмг ик сурһулин һардач Салан Бадм нүр үгдән келв.
Тер мет дарани керг-үүлдвр секлһнә хургт таңһчин залврин Ахлачин дарук, социальн делгрлтин, күч-көлснә болн көдлмшәр тетклһнә министр Өлзәтин Марина, Хальмг Таңһчин Толһачин һардврин ахлачин дарук Шипин Екатерина, Элст балһсна һардврин ахлачин дарук Довгопола Дмитрий үг келв. Тана хоршасн медрлтн иргч үүлдврт ик тусан күргәд бәәх, гиҗ эдн ахр үгдән темдглв.
Хөн сарин 25-д болсн түрүн кичәлд урднь залврин халхар хоршасн медрлинь шинҗллһнә шүүвр болв. Цааранднь доцент Казака Гернзл эндрк заллһна эв-арһсин тускар лекц умшв. Тер мет таңһчин залврин Ахлачин дарук, то-дигин делгрлтин министр Этән Алексей өдгә цага эв-арһс олзллһна тускар келҗ өгв.
СВО-н ветеранмудт психологин халхар гүн медрл өггднә. Эврә болн эрдмин керг-үүлиг хамцулҗ күцәмҗ бәрхин тускар хальмг вузин психологин төвин һардач Бардан Нина күүндвр кеҗ, дамшлтын көдлмш чигн бүрдәв.
Дарук өдрмүдт то-дигин эв-арһсин тускар күүндвр болв. Тер мет экономикин кесг төр шинҗллһнә болн эн халхар учрдг төр хаһллһна туст ямаран эв-арһ бәәхинь медхәр СВО-н ветеранмуд «Әрәсән Өмн үзг» гидг корпорац» нертә нааднд орлцв. Тер наадыг ах багш Эдуард Сокальский бүрдәҗ соңсачнрин белдвринь шинҗлҗ сүв-селвгән өгв.
Залврин халхар чинртә төрмүд хаһллһна эв-арһ олҗ, бачм кевәр шиидвр батллһна дамшлтын тускар шинҗләч Станислав Романенков даруһас болсн семинармудт келҗ өгх. Бүрдәцсин болн залврин багмудын делгрлтин Президентин академин ханьд эн багш орна. Шинҗләч экономикин салвриг бүрдәлһнә төр хаһллһна тускар соңсачнрт келҗ өгәд, теднә медрлинь болн белдврин кемҗәһинь шинҗлхмн. Цааранднь орн-нутгиг заллһна халхар йосн биш уха, шин эв-арһс яһҗ олзлхин тускар «Баатрмуд-08» көтлврт орлцҗадг ветеранмуд медҗ авад, керг-төрин соньн нааднд болн экономикин салврин олн зүсн төсв белдлһнә керг-үүлдврт орлцхнь лавта.
Одахн Әрәсән Президент Владимир Путин СВО-н ветеранмудыг Москван Кремльд цуглулҗ, әмтнә социальн болн нань чигн төр хаһллһнд һол оньган өгч, нөкд болх күсл тәвәд бәәхлә цуг керг бүтх гиҗ темдглв. Цуг Әрәсән, эврә регионмудын залврин чинртә кергт улм шунмһаһар орлцҗ, цергә шишлң керг-үүлдврин ветеранмуд теднд даалһсн көдлмшиг даавртаһар күцәнә. Кесгнь Орн-нутгин Хүүвин шин ханьд орх седклән медүлҗәнә. Тиим шунлтынь орн-нутгин һардвр дөңнҗәнә, яһад гихлә мана баатрмуд Төрскндән итклтәһән, ямаран чигн керг хаһлхд белн болҗахан цергә керг-үүлдврин йовудт иткүлсн болдг.
ТҮРВӘН Һуна

Видео