Олна бүртклһиг бүрдәлһнә тускар

Сегодня, 11:34 | Общество, Таңһчин зәңгс, Зіњг

Суңһвр бүртклһнә Хальмгин олна штабин сүүр хөн сарин 26-д таңһчин залврин герт болв. Эн җилин һаха сард дууһан өглһнә хамцу өдрлә болх суңһврин кесг керг бүрдәгдх. Теднә йовудын олна бүртклһиг яһҗ дигтә-даратаһар белдхин тускар сүүрт тодрха күүндвр болв. Эн төрәр Хальмг Таңһчин олна штабин һардач Мучан Баатр зәңгллһ кев. Энүнә келсәр, 2026 җилин намрар Әрәсән Орн-нутгин Хүүвин йисдгч хуралтын депутатнрин, тер мет Элст балһсна Хургин депутатнрин суңһвр болхмн гиҗ Баатр Иванович келв.
Хальмг Таңһчд 2026 җилд болх суңһврин керг-үүлдвр заканла ирлцәтәһәр болн үнн-чик кевәр бүрдәгдх зөвтә, тернь олна штабин гешүдин болн шинҗләчнрин күцәх һол төр болҗана. Суңһвр бүртклһнә олна штаб таңһчин партьсла, Суңһврин комиссьлә залһлда бәрҗ көдлнә. Тер мет күүнә зөв харсдг күцц зөвтә элчлә, шинҗләчнрлә хамцу үүлднә.
Таңһчин Олна палатын һардачин келсәр, эн суңһврт Хальмг Таңһчин болн Әрәсән Олна палатмудын болн олна партьсин нерн деерәс суңһврин йовудыг бүртклһнә көдлмш күцәгдхмн. Олна палатын болн олна штабин улд кесг җилин эргцд дамшлтта олна бүрткәчнр үүлдҗәнә, болв эдниг җил болһн шинәс сурһх кергтә, яһад гихлә суңһврин туск заканд сольврмуд орулгдна, түүнә тускар бүрткәчнр бас медҗ эврәннь үүлдвртән олзлх зөвтә гиҗ олна штабин һардач темдглв.
- Җил болһн бүрткәчнрин сурһуль цуг регионмудт болн Хальмг Таңһчд бүрдәгднә, тер мет эдниг сурһдг шинҗләчнрин дамшлтыг байҗуллһна семинармуд ЮФО-н балһсдт бүрдәгднә. Би таңһчин Олна палатын болн олна штабин шинҗләч болсн деерән кесг җилин эргцд бүрткәчнриг сурһнав, эн җил чигн тиим керг-үүлдвр Элстд болн кесг райодар күцәгдх, - гиҗ «Медрл» ниицәнә һардач Саңһҗин Элеонора күүндврт орлцв.
Штабин нань чигн гешүд үг келҗ шинҗләчнрин көдлмшән дигтә-даратаһар күцәх седклән медүлҗ, бүрткәчнрин то икдүлх седлклән медүлв.
Олна штабин медлд суңһврин йовудыг шуд кевәр бүртклһнә кесг кергсл бәәнә, таңһчин профсоюзин талвңд тернь бәәршлҗәнә, бүрткәчнр болн олна партьсин болн бүрдәцсин элчнр терүг эврә көдлмштән өргнәр олзлна.
ҖААХАН Бадм

Видео