Әрәсән күч-көлсчнрин хургт орлцв

Сегодня, 11:38 | Общество, Таңһчин зәңгс, Зіњг

Шидр Әрәсән Федерацин Хүүвд орн-нутгин селәнә күч-көлсчнрин хург болв. Терүнд Хальмг Таңһчин Олна палатын гешүн, цергә шишлң керг-үүлдврин ветеран Хулхачин Һәрә орлцснь темдгтә болв.
Хургин йовудт Һәрә Сергеевич үг авч, селәнә һазрт эврә кергән бүрдәсн улсин төрмүдин тускар тодрхаһар келв. Эн эврән крестьянск-фермерск эдл-аху бүрдәһәд, мал асрҗана.
Тодлхас, 2024 җиләс авн орн-нутгин Президент Владимир Путин цергә шишлң керг-үүлдврт орлцачнрин төлә «Агромотиватор» нертә көтлвр зарлсн билә. Тегәд Төрскән харсч йовдг улс цергә даалһвран күцәһәд, хәрҗ ирәд, селәнә эдл-ахун халхар көдлҗәдг болв.
Нидн Хулхачин Һәрә эн көтлврт орлцхин төлә бәрмт цаасан белдәд, Хальмгин селәнә эдл-ахун министерствд ирәд эрлһән орулв. Ахр цагин болзгт Әрәсән ирлцңгү Министерств энүнә зура батлад, «Агромотиватор» көтлврт орлцулх зөв өгсн болдг.
Өдгә цагт СВО-н ветеран Көтчнрә района Чкаловский селәнд бүрдәсн эдл-ахуд бод мал асрҗана. Өөрхн иргчдән эн бордлһна талвң тосхад, үүлдврән делгрүлхәр зуралҗана, зуг энүнә төлә эдл-ахуд сән таал тогтах кергтә, нег үлү электрокүч орулхд эн Әрәсән Федерацин Хүүвин Ахлач Валентина Матвиенког нөкд болхиг сурв.
– Мини өвкнр Төрскән харсгч Алдр дәәнд орлцад, диилвр делдхд ик ач-тусан күргсн улс болна. Дәәнә хөөн төрскн һазриг шинәс босхад, малын ард йовсмн. Ааван әмд-менд үзсндән хөвдән ханнав. Тегәд ода болхла өвкнрин кергиг цааранднь делгрүлхәр шунҗанав, – гиҗ Хулхачин Һәрә келв.
Валентина Матвиенко Һәрә Сергеевичиг оньган өгч соңсад, энүнә үүлдвринь үнләд, эндр «Агромотиватор» көтлвр орн-нутгин 73 регионд сән йовудтаһар күцәгдҗәнә, гиҗ темдглв. Тер мет Валентина Ивановна Әрәсән энергетикин министрин дарук Евгений Грабчакд хальмг фермерин төртнь орлцад, дөң-тусан күргхинь даалһв.
Эн туст Хальмг Таңһчин Толһач Хаска Бату ухан-тоолврарн бас хувалцв. Энүнә келсәр, нарна толя олзлад теегин һазрт электрокүчәр теткдг ирлцңгү кергсл углҗ тәвдг арһ бәәнә. Өдгә цагин эв-арһсиг делгрүлҗ, селәнә һазрт кергән бүрдәдг улст, нег үлү СВО-н ветеранмудт сән таал тогталһнд туслгдхнь лавта, гиҗ Бату Сергеевич темдглсн болдг.
КАРСАНА Евгения
Зургт: Хулхачин Һәрә болн
Әрәсән селәнә эдл-ахун министр
Оксана Лут

Видео