Баатрмудын туск һәәхүл секгдв

Сегодня, 11:46 | Общество, Таңһчин зәңгс, Зіњг

Урҗ өдр Элст балһсна һардврин толһач Лиҗикә Алдр Москван Пресненск дуһргин толһач Виктория Корховала хамдан нөкцлтин бооца батлв.

Тер өдр бичкдүдин үүдәлтин Герт «Единство ради Победы» нертә һәәхүл секгдв. Энүнд Төрскән харсгч Алдр дәәнә 14 баатрин тускар келгдҗәнә. Москван сулдхврт орлцсн болн нег һазра Советин Союзин Баатрмудын тускар һәәхүл тодрхаһар медүлҗәнә.
Москван Пресненск дуһргин баһчудын Палатын гешүд Иван Костин болн Юлия Капустина эн төсв үүдәсн болна. Эднә келсәр, дорас өсч йовдг үйнр Төрскнәннь баатрмудын тускар медтхә гиһәд, эн һәәхүл бүрдәхәр шиидсмн. Урднь һәәхүлиг Москвад Хальмгин элчллтд үзүлсн билә. Олн-әмтн ирҗ терүг хәләснь темдгтә болв.
Элстин бичкдүдин үүдәлтин Герт болсн һәәхүлд Элст балһсна һардвр, Төрскән харсгч Алдр дәәнә ветеран Петр Леонтьев, баатрмудын өөрхн элгн-саднь болн баһчуд олар ирсинь темдглх кергтә.
Советин Союзин Баатр Сельгикә Михаилын өөрхн улс Сельгикә Валерий болн Кайлакан Анастасия эн керг-үүлдврт бас орлцв. Тууҗлгч санл хадһллһнд ач-тусан күргҗәдг төләднь Москван Пресненск дуһргин толһач Виктория Корхова теднд Ханлтын бичгүд бәрүлҗ өгв.
– Ирлцңгү керг-үүлдврмүд даңгин давулх кергтә,тер юңгад гихлә эндрк баһчуд Төрскнәннь харсачнрин тускар медх зөвтә. Һәәхүлин бүрдәһәчнрт мини эцкин зургиг орулснднь ханлтан өргҗәнәв, – гиҗ Сельгикә Михаилын көвүн Валерий Михайлович келв.
Элст балһсна һардврин толһач Лиҗикә Алдрин келсәр, эн һәәхүл улсин ниицлтин җилд мана балһснд үзүлгдҗәхнь темдгтә. Дәәнә цагт мана орн-нутгин олн келн-улсин элчнр ахнр-дүүнр мет цуһар диилвр делдхд туслв. Тер мет өдгә цагт цергә шишлң керг-үүлдврин йовудт өвкнрин үлгүрәр Әрәсән олн келн-улс олна кергин төлә хамдан дәәлдҗ йовна гив.
«Единство ради Победы» нертә һәәхүлд орсн зургуд Элст балһсна дунд сурһульмудт бас үзүлгдхмн, тиигхлә, арвтнр орн-нутгин болн таңһчин баатрмудын тускар медхнь лавта болхмн.
ОЛЬДАН Цаһан

Видео