Тохма малын һәәхүл секгдв

Сегодня, 11:55 | Общество, Таңһчин зәңгс, Зіњг

Өцклдүр Элстд тохма хөөдин болн ямадын Цугәрәсән XXVI һәәхүл байрин бәәдлд секгдв.
Әрәсән селәнә эдл-ахун Министерств, Хальмг Таңһчин залвр, хөд өсклһнә халхар келн-улсин ниицәнә коммерческ биш бүрдәц энүг давулҗана. Һәәхүлин йовудт олн зүсн харһлтс, «төгрг ширән» сүүрмүд болн номин хургуд давхмн. Энүнд орн-нутгин фермермүд болн номтнр мал өсклһнә халхар дамшлтарн хувалцҗ, өдгә цагин эв-арһсиг яһҗ олзлҗахан келҗ өгхмн.
Эн җилин һәәхүлд орн-нутгин 20 һар регионас нүүрлгч 50 эдл-аху орлцҗана. Әәдрхнә, Аһшин, Ростовск, Херсонск, Ивановск, Калужск, Калининградск мүҗсин, Сарпулин, Краснодарск, Забайкальск краймудын, Татарстан, Дагестан, Ингушетия, Тыва, Алтай Республикүдин элчнр ирсмн.
Керг-үүлдвриг Хальмгин залврин Ахлач Босхмҗин Гилән секәд, мана таңһчд селәнә эдл-ахун һәәхүл давулгдҗахнь темдгтә гиҗ келв.
Әрәсән селәнә эдл-ахун министрин дарук Роман Некрасов XXVI һәәхүл бүрдәсн Хальмгин һардврт ханлтан өргәд, керг-үүлдврин көдлмшт күцәмҗ дурдв. Һәәхүлиг секлһнә керг-үүлдврт «Өорднр» бииһин театр орлцад, билг-эрдмәрн байрлулв.
Дарунь гиичнр һәәхүлд авч ирсн хөд-ямадыг хәләв. Тер мет һәәхүлин йовудт тохма хөөдин аукцион, хөд кирһәчнрин марһан, билг-эрдмин коллективсин концерт болн талдан соньн керг-үүлдврмүд давулгдхмн.
Мана таңһчин нүүрлгч эдл-ахус, грозненск, сарпулин, сарпан, хар һазра меринос болн талдан тохма хөөдән һәәхүлд үзүлҗәнә.
Тодлхас, сүл кесг җилмүдт мана таңһчин эдл-ахус күцәмҗ бәрәд, нег һазра улсин төлә байр-бахмҗ болснь лавта. Мана фермермүдин күч-көлсинь һәәхүлд үнлснь бас темдгтә болв.
Элстд давҗадг эн һәәхүлин тускар тодрхаһар даруһас зәңглхвидн.
БАДМИН Занда

Видео