Хаалһтн цаһан болтха!

Сегодня, 12:00 | Общество, Таңһчин зәңгс, Зіњг

Хөн сарин 26-д Элстин 4-ч тойгта сурһульд болсн сүл хоңхин байрт таңһчин Толһач Хаска Бату орлцҗ, сурһульчнриг йөрәв.
Энд сурһульчнр болн теднә эк-эцкнр, элгн-садн, багшнр олар цуглрв. 11-ч болн 9-ч классмудын арвтнрин төлә сүл хоңхин керг-үүлдвр болв. 11 җилдән энд сурад, багшнрас медрл болн сурһмҗ авсн күүкд-көвүд эн өдр зөвәр үүмәтә бәәв.
Сурһульчнриг, эднә багшнриг болн эк-эцкнриг таңһчин Толһач Хаска Бату йөрәҗ, арвтнрин төлә җирһлин шин девсң эклҗәнә гиҗ заав. «Сурһульдан тадн медрл авсн деерән үнн-чик седклтә, дааврта, Төрскндән дурта болдгиг дасч авлат. Тиим сурһмҗ мана күүкдт бәәдл-җирһлин йовудтнь туслтха», - гиҗ Бату Сергеевич дурдв.
Хотл балһсна 4-ч тойгта сурһульд прокурорин класс одахнас авн гилтә үүлдҗәнә, энд сурчах күүкд цааранднь орн-нутгин юристин вузмудт орҗ сурх гиҗ таңһчин Толһач итклән медүлв. Шүүврән сәәнәр өгәд, чик хаалһан йилһҗ авад, Хальмг Таңһчин делгрлтд зөвтә тәвцән орулҗ сән мергҗлтнр болтн, гиҗ Бату Сергеевич бүлән үгән нерәдв.
Дарунь 11-ч болн 9-ч классмудын арвтнр билг-эрдмән үзүлҗ хальмг би биилв. Цуг сурһульчнрин төлә сүл хоңх җиңнв. 11-ч классин арвтнр Мучкан Тимдҗин болн Палтна Цолмн, 1-ч классин сурһульчнр Хаска Адьян болн Манҗин Аяна сүл хоңхиг җиңнүлҗ, күндтә даалһвр күцәв.

ТҮРВӘН Һуна

Видео