Медәтнр марһлдв

Сегодня, 13:31 | Общество, Таңһчин зәңгс, Зіњг

Сүл цагт мана бәәдл-җирһл ниигмин сүлҗәнлә, өдгә цага эв-арһсла бат залһлдата болв. Эндр гертәсн һарлго шаңһа туслмҗ олзлҗ эмчд бичгдҗ, ямр нег дөңцл дем авхин төлә эрлһән орулҗ, талдан балһсдт бәәтхә, һазадын орн-нутгудт бәәдг үүрмүдтән болн элгн-садндан дарунь зәңг йовулҗ болхнь цугтаднь таасгдҗана. Баһ наста улс дарунь өдгә цага эв-арһс олзлдгиг дасч авдг болхла, медәтнрт тернь амр болхш. Тегәд эднә төлә әмтнә социальн теткврин төвмүдин улд шишлң кичәлмүд бүрдәгднә, эдниг урмдулхин төлә марһас чигн давулгдна.
Шидр Элст балһснд ах үйин улс дунд компьютерн эв-арһс олзллһна Цугәрәсән XVI марһана таңһчин девсң болв. Хойр җил хооран терүнд зуг арвн күн орлцсн болхла, нидн теднә то хойр холванд өсснь темдгтә. Эн җил марһанд 18 медәт орлцад, өдгә цага эв-арһс олзллһна туст даалһврмуд күцәв. Хальмг Таңһчин социальн делгрлтин, күч-көлснә болн көдлмшәр тетклһнә министерствин әңгин һардач Эдгән Татьяна болн Әрәсән пенсионермүдин ниицәнә Хальмг Таңһчд үүлддг әңгин ахлач Карвенә Нимгр марһанд орлцачнриг йөрәһәд, олна бәәдл-җирһлд шунмһаһар орлцҗ, билг-эрдмән делгрүлҗ, седвәртә үүлдврәрн баһчудт үлгүр болдг төләднь ханлтан өргв.
Дарунь марһан эклв. Медәтнр хойр хорад компьютер олзлад, олн зүсн төрәр өггдсн сурврмудт хәрү өгв. Тер мет эдн шаңһа туслмҗин дөңгәр эмчд бичгдәд, эн эв-арһиг олзлҗ чаддган үзүлв. Әрәсән социальн саңгин ниигмин сүлҗәнд бичгдәд, марһанд орлцҗахан герчлҗәдг зург цокч барлв. Зәрмснь даалһврмудыг дарунь күцәһәд, өдр-бүрин йовудт ниигмин сүлҗәнд өдгә цага эв-арһс олзллһна туст ик дамшлт хоршасан медүлв. Эднә келсәр, даалһврмуд соньн болн амр болв.
Таңһчин әмтнә социальн теткврин төвин һардач Светлана Роман марһана аш дигләд, дииләчнриг ачлв. Тиигәд, Наталья Курепина Элстәс III девсңгин, Ирина Вереницина Городовиковск районас болхла II девсңгин Дипломсар ачлгдв. Надежда Алешкина Үстин районас болн Басңга Анатолий диилвр бәрәд, I девсңгин Дипломсар болн үнтә белгәр ачлгдв. Надежда Ивановна болн Анатолий Федорович Рязань балһснд болх марһанд орлцад, Хальмг Таңһчин нер харсх зөв авв. Найн наста Татьяна Шовелева хамгин наста орлцач болад онц мөрәһәр ачлгдв, Ванькинә Валентина болхла диилвр бәрхәр зүтксн төләдән бас мөрәлгдв. Келхд, марһанд орлцач болһнд Күндллһнә һашг болн белг бәрүлҗ өггдв.
Басңга Анатолийин келсәр, эн түрүн болҗ иим марһанд орлцв. Медәт олн җилин туршарт ширә деер нааддг теннисәр болдг марһаст орлцҗ, чик авг-бәрц делгрүлхәр зүткнә. Ода эн СоцТех РГУ-н Хальмг әңгин оютнриг теннисин наад дасхчана. Эн өдгә цага эв-арһс олзлҗ олн зүсн зурц белднә, зургуд барлна. Марһана даалһврмуд энүнд соньн болҗ медгдв, зәрм сурврмудт хәрү өгхин төлә ухалх кергтә болв. Тер бийнь эн шаңһа туслмҗ дару-дарунь олзлдг төләдән цуг даалһврмудыг күцәҗ чадв. Диилвр бәрсндән медәт байрлад, ода Әрәсән марһанд белдвр кех кергтә гив.
Үстин района әмтнә социальн теткврин төвин бәәдл-җирһлд шунмһаһар орлцдг Надежда Алешкина сүл җилмүдт РМО-н һардврт көдлҗ йовсмн. Көдлмшин халхар эн өдр болһн өдгә цага эв-арһс олзлҗ, ниигмин сүлҗәнд чигн дарунь кергтә зәңг олҗ авна. Медәт бас эн марһанд түрүн болҗ орлцв, тегәд диилвр бәрснь энүнд бахмҗта болв. Надежда Ивановна района марһаст орлцҗ, сул цаган сергмҗтәһәр давулна. Района социальн теткврин төвин мергҗлтнр марһанд белдхд дөң-нөкд болснд эн ханлтта бәәнә. Ода таңһчин нер харсч Әрәсән марһанд орлцҗ диилвр бәрхин төлә арднь орҗ белдх кергтә. Цуг орн-нутгин медәтнрлә дөрлдхнь ик дааврта болҗана, гиҗ Надежда Ивановна темдглв.
ДООҖАН Наталья

Видео