Орс-хальмг авъяс хадһлдг өрк-бүл

Сегодня, 13:41 | Общество, Таңһчин зәңгс, Зіњг

Одахн «Җилин сән гисн өрк-бүл» гидг марһанд Яшкулин района Хар Толһа селәнәс ирсн өнр-өсклң Чулюкановихнә өрк-бүл хальмг-орс улсин авъяс хадһлҗадгин тускар келәд, «Шарка-барка» хамдан бииләд, олна оньг авлв. Герин эзн орс Евгений Владимирович, хальмг аваль Оксана Валерьевна хамдан Зул, Цаһан Сар, Масленица, Пасха байриг әдл темдглҗ, өвкнриннь авъясар цугинь кенә. Хөрн һар җил хооран өркән өндәлһәд, эдн тавн үрндән чик сурһмҗ өгч, олн келн-улсин авъяс, авг-бәрц тевчҗ, әмтнлә ниитә бәәнә.
Мария Ивановна Чулюканова олн җилдән селәнә поштд көдләд, ода ачта амрлһнд бәәнә. Евгений көвүнь хальмг күүк дахулҗ ирснд экнь байрлад, ачнран өкәрлҗ өскчәнә. Эднә өрк-бүл хам-хоша бәәдг Сарпулин крайд бәәсмн, болв Хальмг Таңһчас эңкр һазр уга гиҗ медәт келнә. Ээҗ ачнртан орс улсин авъясмудын тускар келҗ, ямр нег сән өдрлә күцәдг йорсхл зааҗ өгнә. Влада болн Мария ээҗтәһән хамдан бәәһәд, геринь ахулҗ, дөң-нөкд болна.
Ууһн Влада селәнә дунд сурһульд багшлна, Ульяна болн Илья оютнр, Мария 7-ч классин сурһульч, отхн Александра зурһата, ирх җилд күүкн 1-ч класст орхмн. Күүкднь цуһар сурһулин болн селәнә бәәдл-җирһлд шунмһаһар орлцҗ билг-эрдмән үзүлнә. Селәнә сойлын Герин улд үүлддг «Булг» ансамбльд эдн дуулна. Илья волейбол наадна, өөрхн иргчдән эн спортын халхар үүлддг багшин эрдмтә болхмн. Олн үртә өрк-бүлд өсчәдг күүкд цуһар бичкнәсн авн эк-эцкдән нөкд болад, герин көдлмш кенә, малын хаша-хаац цеврлҗ, хотынь өгнә. Чулюкановихн гер деерән бод мал, хөд, шовуд, һаха асрна. Евгений Владимирович заһс бәрхдән болн аңһучлхдан дурта.
- Әрәсәд улсин ниицлтин җил болҗана. Мана селәнд хальмг, орс, хасг өрк-бүлмүд кен-негнәннь сойл, авъяс күндлҗ ниитә бәәнә. Авальм хальмг һазрт өсәд-боссмн, тегәд хальмг кел сәәнәр меднә. Ямр нег сән өдр болхла, бидн хадм экән йөрәҗ, хамдан байриг темдглнәвидн. Өрк-бүлмүд дунд болсн марһанд бидн түрүн болҗ орлцвидн, маднд цугнь таасгдв. Таңһчин талдан райодас ирсн өрк-бүлмүд бас билг-эрдмән үзүлв. Мана таңһчд билгтә, өнр-өсклң, ниитә олн өрк-бүлмүд бәәхиг эн марһан герчлв. Герин эзн болн көвүм гитар цокад ду дуулна, - гиҗ Оксана Валерьевна келнә.
Олн үртә өрк-бүлмүд дунд болсн марһан зөвәр зүткәтә болв, терүнд тавн, зурһан, йисн үртә өрк-бүлмүд орлцсн билә. Чулюкановихнә өрк-бүл марһанд диилвр эс бәрсн бийнь таңһчин залврин Ахлачин дарук-таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан шиидврәр онц белгәр ачлгдв. Олн үртә экин келсәр, өңгтә телеүзл болн талдан үнтә белг эднд белглснь ик байр үүдәв. Эдн марһанд орлцсн өрк-бүлмүдлә таньлдҗ, нег-негән дөңнҗ, диилвр бәрснләнь йөрәҗ, цаган сергмҗтәһәр давулв. Иим марһас эрк биш кергтә, өрк-бүл болһн терүнд орлцҗ билг-эрдмән үзүлҗ чадна, гиҗ Чулюкановихн тоолҗана.
Бичкн селәнд өсәд-босад, өркән өндәлһсн Евгений болн Оксана Чулюкановихн өвкнриннь авъясар ниитә бәәнә.
ДООҖАН Наталья
ЗУРГТ: таңһчин залврин Ахлачин дарук-таңһчин социальн делгрлтин, күч-көлснә болн көдлмшәр тетклһнә министр Өлзәтин Марина өнр-өсклң Чулюкановихнә
өрк-бүлиг ачлҗах кем

Видео