Яшкулин районд одв

Сегодня, 14:39 | Общество, Таңһчин зәңгс, Зіњг

«Торһн зам хаалһар болсн зуульчллһн-2026» гидг төсвин нарт-делкән делегацд орлцачнр Яшкулин районд одв. Хальмг Таңһчин селәнә эдл-ахун министр Гаван Тимур болн Яшкулин района толһач Эдгән Бора күндтә гиичнриг «Улан хөөч» эдл-ахуд күргәд, услврин һазр үзүлв.
Малд шимтә хот урһалһна, хотын чинр ясруллһна болн урһцин кемҗә икдүллһнә төлә өдгә цага эв-арһс олзллһна өвәрц дамшлт гиичнриг соньмсулв. Малд щүрүн хот кеҗ һарһлһна төлә услврин шишлң кергсл олзлдгин тускар эдл-ахун һардач Эрднин Арлтан келҗ өгв.
Тер өдрин бийднь гиичнр 28-ч Әәрмин цергчнрин санлын бумбд одв. Төрскән харсгч Алдр дәәнә цагт энд болсн ик бәрлдәнә, Әәдрхнә өөр-шидр немшнриг күүчҗ мана салдсмуд залу-зөрмгән үзүлснә тускар гиичнрт келҗ өггдснә дару эдн бумбд цецгүд тәвәд, әмнәсн хаһцсн дәәчнрин санл тевчв. «Торһн зам хаалһар болсн зуульчллһн-2026» гидг төсвин нарт-делкән делегацд орлцачнр цааранднь Әәдрхнә мүҗд һарч йовв.
Хальмг Таңһчин шинҗләчнр һазр көдәрлһиг гетллһнә халхар талдан регионмудын болн нарт-делкән мергҗлтнрлә нөкцҗ үүлдҗәхнь малын идгүд хадһллһна көдлмш күцәмҗтә болхд туслхнь лавта.

Мана зәңгч

Видео