Әәмшг уга бәәдл теткҗ

Сегодня, 11:41 | Общество, Таңһчин зәңгс, Зіњг

Шидр «Госкорпорация по ОрВД» ФГУП-ин «Аэронавигация Юга» Аһшин төвин Элстин әңгин һучн җилин өөнд нерәдгдсн байрин хург болв. 1996 җилд мөчн сарин 1-д болсн шинрлтсин ашт Элстин әңг бүрдәгдәд, таңһчин хотл балһсна аэродромд аһарин җисә заллһна болн әәмшг уга бәәдл тетклһнә үүлдврән эн эклсмн. Эн җилмүдин эргцд әңгин мергҗлтнр Әрәсән Өмн үзгт әәмшг угаһар нисхин төлә ирлцңгү таал тогтаҗ, өдгә цага эв-арһс өргнәр олзлдг болад, таңһчд дигтә-дарата үүлдвр теткв. Байрин хургт олн җилин туршарт үнн-чик кевәр церглҗ йовдг мергҗлтнриг ачлад, бүрдәцин делгрлтд туслҗадг улсин тускар бүләнәр келв.
Хальмг Таңһчин Улсин Хуралын (Парламентин) Ахлачин дарук Нуура Николай, таңһчин залврин Ахлачин негдгч дарук Цернә Эрднь (зургт), «Аэропорт Элиста» АО-н һардач Максим Петрухин, аһарин көлгнә орн-нутгин Агентствин Өмн үзгин заллтын һардач Вячеслав Онуфриенко, Элст балһсна Хургин Ахлачин дарук Александр Владимиров, таңһчин тосхлтын, көлгнә болн хаалһин эдл-ахун министрин дарук Хаска Владлен Элстин әңгин көдләчнриг өөнлә йөрәһәд, ачлврмуд бәрүлҗ өгв.
Вячеслав Онуфриенко урднь эн әңгд арвн җилдән көдлсмн, тегәд эн үүрмүдән йөрәһәд, эднә өөнин хургт орлцхар ирсндән ик байрта бәәхән медүлв. «Элстин аэропортд аһарин җисә тетклһнә, таңһчин меҗәд нисдг көлгнә төлә әәмшг уга бәәдл теткгдсн бәәнә гиҗ аһарин көлгнә орн-нутгин Агентствин Өмн үзгин заллт бат ицлтә болна. Тернь учрта, юңгад гихлә энд ик дааврта, өөдән мергҗлттә улс көдлнә. Эн әңг бүрдәгдсн цагт көдлҗ йовсн улс байн дамшлтарн баһчудла хувалцҗ, медсән-чадсан эднд зааҗ өгсмн. Баһчуд теднә эклсн кергиг сән йовудтаһар күцәҗ йовхнь бахмҗта», - гиҗ Вячеслав Онуфриенко келв.
Элстин әңгд олн җилдән көдлҗ йовдг Җамбина Эрднь, Елена Жук, Александр Игнатов, Николай Стасенко, Василий Малышев, Михаил Воржовенко, Бичкнә Басң, Бадмин Санҗ болн нань чигн көдләчнр Хальмг Таңһчин Толһачин, Хальмг Таңһчин Улсин Хуралын болн таңһчин Залврин Ханлтын бичгүдәр болн Күндллһнә һашгудар ачлгдв. Келн-улсин театрин артистнр бүрдәцин көдләчнрт билг-эрдмән үзүлҗ, сергмҗ үүдәв.

БАТАН Сәәхлә

Видео