Гевш Йонтен Китд нутгт болсн хургт

Сегодня, 12:10 | Общество, Бурхн-шаҗна төрәр

Китдт болҗадг ООН-а тууҗлгч хургт гевш Йонтен одв. Әрәсән сүзгтнрин делегац орн-нутгин шар шаҗна улсин оюни төв заллтын ахлач гевш Йонтена һардврт Ниицүлгдсн Келн-улсин бүрдәцин (UNDV) 21-ч хургин көдлмшт орлцв.
Китд Улсин Республикин Цзянсу провинцин Уси балһснд тер хург болв, цуг делкән сүзгтнрин төлә эннь йоста тууҗлгч йовдл болҗана. Тиигчкәд эн йовдл түрүн болҗ Китдин һазрт учрв. Урднь иим байрин керг-үүлдврмүд Таиланд, Вьетнам, Шри-Ланка нутгудт кегддг бәәсмн.
Китдин шар шаҗна бүрдәцин болн Нарт-делкән хүүвин үрврәр Әрәсән делегац эн хургт орлцсмн. Делегацин ханьд Бурятин, Тыва Республикүдин элчнр орсмн. Цуг эннь Москва болн Пекин хоорнд шаҗна болн сойлын залһлдан батрҗахиг герчлҗәнә.
Хургин һол төрнь цуг келн-улсин иргчин төлә болн аһу ик кемҗәнд бат делгрлт тетклһнә төлә Бурхн Багшин номин цецн ухан күргҗәдг нилч болв. Энүнә йовудт цуг күмн әмтиг соньмсулҗадг чинртә дөрвн төрәр күүндврмүд болв. Бурхн Багшин номин һол зөрүллтәс иштә күн болһна болн бүклдән цуг улсин җирһлд учрҗадг тоотыг цәәлһгч төрмүд хәләгдв. Бурхн-шаҗна үүлдәчнр экономикин болн социальн делгрлтин туст ямаран хәләцтә бәәхән медүлв. Бат эвин бәәдл тогталһна болн эн туст орн-нутгуд хоорнд нөкцлт батллһна төрмүдәр шаҗна үүлдәчнр тоолврарн хувалцв.
Цуг улсин Өдр - делкән сүзгтнрин төлә йосндан әрүн ик байр болв. Бурхн Багш һарсн, Гегәрлтин хаалһд орсн, паранирванад залрҗ һарсн әрүн чинртә Өдрлә тернь ирлцснь нег үлү евәлтә болв.
ООН-а Генеральн Ассамблей эн Өдрин нарт-делкән чинринь темдглв. Әрәсән Федерацин Президентин медлд үүлддг шаҗна цуг бүрдәцслә хамцу үүлдвр күцәлһнә Хүүвин гешүн болҗ үүлдҗәдг гевш Йонтен Китд нутгт күндтә гиич болҗ ирсмн. Китдин шар шаҗна бүрдәцин һардврла эн йовлһндан гевш Йонтен харһҗ күүндв. Талдан орн-нутгудын делегатнрла чигн учрсн харһлтс туста болв.
ҖИРҺЛИН Кермн

Видео