Өр-өвч седклтә улс болад

Сегодня, 15:05 | Общество, Таңһчин зәңгс, Зіњг

Шидр Элстд социальн көдләчин Өдрт нерәдгдсн байрин хург болв. Әмтнә социальн харслтын болн көдлмшәр тетклһнә бүрдәцсин, медәтнрин болн гемтә-шалтгта улсин гер-интернатмудын көдләчнр, эн халхд олн җилдән көдлҗ йовсн ветеранмуд байрин хургт цуглрв. ЮФО-д Әрәсән Президентин күцц зөвтә элчллтин аппаратын Хальмг Таңһчд ах федеральн инспектор Александр Беляев, Хальмг Таңһчин Улсин Хуралын (Парламентин) Ахлач Артем Михайлов, таңһчин залврин Ахлачин негдгч дарук – таңһчин финансин министр Шурһчин Очр, таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина социальн көдләчнриг йөрәһәд, өөдән ачлврмуд бәрүлҗ өгв.
Ачлгдсн улс дунд Октябрьск района әмтнә социальн теткврин төвин социальн көдләч Бамбша Любовь заагдв. Олн җилдән үнн-чик седклтәһәр көдлҗәдг төләдән Любовь Гавановна «Әмтнә социальн харслтын Әрәсән ачта көдләч» гидг нер зүүв. Дөчн шаху җилдән төрскн селәндән социальн көдләчәр көдлҗәдг күүкд күн 4 үртә эк болн 6 ач-зеетә ээҗ болна. Ода энүнә килмҗтә хәләврт долан медәт бәәнә, зәрминь эн хөрн һар җилдән хәләҗ дөң-нөкд болҗана. «Эн җилмүдин эргцд медәтнр нанд өөрхн улс болв, тегәд күн болһна заңгинь, авг-бәрцинь медәд, бидн сәәнәр таарнавидн. Күн болһнд цаһан седкләрн нөкд болхар шуннав. Өдр болһн медәтнр талан адһад, гертнь сән таал тогтаҗ, кергтә хот-хоолынь хулдҗ өгәд, баһ цага тодлврмудынь соңсад, эдндән нүдн-амн болнав. Хамдан көдлҗәдг үүрмүдән сән өдрлә йөрәҗ, көдлмштнь күцәмҗ дурдҗ, тесвртә, өр-өвч седклтә болҗ, медәтнрт килмҗән тусхаҗ йовтха гиҗ дурдҗанав. Эндр нанд өөдән ачлвр бәрүлҗ өгснд ик байрта бәәнәв», - гиҗ Любовь Гавановна келв.
Яшалтан района әмтиг көдлмшәр тетклһнә төвин һардач Любовь Бондарь-Пономарь, Лаганя әмтнә социальн харслтын әңгин көдләч Бүрән Данара, Лаганя КЦСОН-а социальн көдләч Ванькинә Алла, Көтчнрә района әмтнә социальн харслтын әңгин көдләч Давашкинә Наталья болн таңһчин КЦСОН-а һардач Светлана Роман «Әмтнә социальн харслтын Әрәсән ачта көдләч» гидг нер зүүснд цуглрсн улс байрлв. Хургин йовудт кесгнь күч-көлснә болн социальн харслтын Әрәсән Министерствин, Хальмг Таңһчин залврин Күндллһнә һашгудар, Хальмг Таңһчин Толһачин болн таңһчин Улсин Хуралын Ахлачин Ханлтын Бичгүдәр ачлгдв, «Хальмг Таңһчин социальн харслтын ачта көдләч» гидг өөдән нер зүүв. Дааврта һардачнр социальн көдләчнриг йөрәһәд, эднә көдлмш ик дааврта болн эдн күн болһна төрт орлцҗ, килмҗән тусхаҗ, түрүн нөкднр болна гиҗ темдглв.
Сән авъяст тохрсар таңһчин социальн делгрлтин, күч-көлснә болн көдлмшәр тетклһнә министерствин көдләчнр хамдан тәәз деер һарад, Манҗин Аркадин «Сән байну» гидг ду дуулв. Таңһчин билгтнр бас концертд орлцҗ, сергмҗ үүдәв.
БАТАН Наталья

Видео