Хальмг улсин хәәртә үрнә нерн мартгдшго

Сегодня, 15:32 | Общество, Таңһчин зәңгс, Зіњг

Әрәсән Баатр, батальона һардачин дарук, ах лейтенант Очр-Һәрән Нарн цергә даалһвран күцәҗ йовад әмнәсн хаһцсна туск һашута зәңг таңһчин олн-әмтиг үүмүләд, күн болһнд ик зовлң үүдәв. Хальмг Таңһчин Олна палатын седвәрәр Советин Союзин Баатр Басан Городовиковин бумбин өөр Нарн Алексеевичин зург тәвгдсн билә. Эн өдрмүдт таңһчин әмтн нааран ирәд, цецгүд тәвәд, зул өргәд, Әрәсән Баатрин санл тевчҗәнә. Эн күнд цагла таңһчин улс Әрәсән Баатрин өрк-бүлиг дөңнҗ, зовлңгинь хувалцҗана.
Шидр Хальмг Таңһчин эрүл-менд харлһна министерствин, П.Жемчуевин нертә таңһчин эмнлһнә көдләчнр,УФСИН-ә болн таңһчин МВД-н медлд үүлддг олна хүүвин, «За наших 08» саңгин гешүд, цергә шишлң керг-үүлдврин ветеранмуд, таңһчин профсоюзин федерацин элчнр, Басңга Баатрин нертә Келн-улсин театрин артистнр Баатрмудын Аллейд ирәд, Очр-Һәрән Нарна залу-зөрмгиг тодлад, санлынь тевчв.
- Әрәсән Баатр Очр-Һәрән Нарн хальмг улсин алдр үрнь бәәсмн. Цуг ветеранмудын, таңһчин әмтнә төлә ик зовлңта йовдл учрв, бидн мана Баатрин туск санл хадһлад, дорас өсч йовдг баһчудт төрскнч сурһмҗ өгхвидн. Эндрк баһчуд Нарн Алексеевичәс үлгүр авч, Төрскндән хару, зөрмг, үнн-чик авг-бәрцтә улс болҗ өсх зөвтә. Әрәсән Баатр Очр-Һәрән Нарн сүл әмсхл күртлән цергә шишлң керг-үүлдврт орлцҗадг үүрмүдтәһән хамдан дәәлдв, - гиҗ «Төрскән харсачнр» гидг саңгин таңһчд үүлддг әңгин һардач Хаалһин Очр келв.
П.Жемчуевин нертә таңһчин эмнлһнә ах эмч Чумпинә Саглр болхла Нарн Алексеевичиг таньҗ-медҗ йовсна тускар тодлад, Әрәсән Баатр хальмг улсин бахмҗ бәәсмн гив. «Күнд бәәдлд цергә даалһвран чадм кевәр күцәһәд, кен-негнднь үлгүр болад, залу-зөрмгән үзүлсн һольшг хальмг цергч бәәсн мөн. Эн йоста Төрскән харсач билә. Төрскн, цергә даалһвр энүнә төлә әрүн чинртә бәәсмн», - гиҗ Саглр Юрьевна темдглв.
Әрәсән Баатр, ах лейтенант Очр-Һәрән Нарна санл тевчхәр Баатрмудын Аллейд әмтн өрк-бүләрн, хамдан көдлҗәдг үүрмүдтәһән ирҗәв. Баһчуд бас эн өдрмүдт олар нааран ирҗәснь нег үлү темдгтә болв. Шин җилин өмн өргнд Әрәсән Баатрла болсн харһлтыг эдн тодлҗ, тоолврарн хувалцв. Тер харһлтд зөрмг дәәч өсәд-боссн һазр-усндан эңкр, үнн-чик авцта, зөргтә улс болтн гисн селвгнь баһчудт герәсн болҗ тодлгдв. Әрәсән Баатр Очр-Һәрән Нарн төрскнч седклтә, күцәҗәдг кергтән итклтә күн бәәсмн гиҗ «Бидн Хамдан» ниицәнә ахлач Шахныка Татьяна болн «Движение первых» олна ниицәнә таңһчд үүлддг әңгин һардач Анхана Саглр темдглв. Давсн җилин чилгчәр Нарн Алексеевич Северск балһсиг сулдхсна тускар Әрәсән Президент Владимир Путинд тооцаһан өгәд, эднә батальона цергчнр залу-зөрмг кевәр дәәлдҗ, хортыг күүчснә тускар соңсснь нег һазра улстнь ик бахмҗ болла. Хөөннь Владимир Путин Очр-Һәрән Нарнд Әрәсән Баатрин өөдән нер зүүлһсн билә. Шин җилин өмн өргнд бидн Нарн Алексеевичлә харһад, цергә хаалһиннь тускар соньмславидн. Баһчудла болсн харһлт үр-иньгин таалд давснь мартгдхш. «Хамдан дәәлдҗ йовдг үүрмүд талан одх кергтә. Бидн диилвр бәртлән хамдан цергә даалһвран күцәх зөвтәвидн», гиҗ Нарн Алексеевич тиигхд келсн билә. Мана Баатр әмнәсн хаһцснь мадна төлә ик зовлң болв, әрүн нернь мөңкрх, гиҗ баһчудын нерн деерәс эдн келв.
Хальмг Таңһчин Олна палатын ахлач Мучан Батырин келсәр, Баатрмудын Аллейд Әрәсән Баатрин, ах лейтенант Очр-Һәрән Нарна нерн зөвтә орман эзлхмн.
Өцклдүр таңһчин улс Әрәсән Баатр, хальмг улсин хәәртә үрн Очр-Һәрән Нарниг сүл хаалһднь үдшәв.
БАТАН Сәәхлә

Видео