Эврә эдл-ууш кеҗ һарһхар

Сегодня, 15:35 | Общество, Таңһчин зәңгс, Зіњг

Хальмг Таңһчин Улсин Хуралын (Парламентин) депутат, «Делгрлтин күчн» җисәнә һардач Михаил Богатов дарани харһлт давулад, таңһчин экономик делгрүллһнә туст ямаран төрмүд эркн чинртә болҗахин тускар күүндв. Хальмг Таңһчин Олна палатын гешүд эн харһлтд орлцад, босхгдсн төрмүдәр ухан-тоолврарн хувалцҗ сүв-селвгән орулв. Келхд, күүндвр харһлтын эклцәс авн керг-төрин бәәдлд давулгдсинь темдглхмн.
Хальмг Таңһчин Олна палатын ахлач Мучан Батыр харһлтыг нүр үгәр секәд, Михаил Богатов олзта-орутаһар үүлдҗәдг, күцәмҗтәһәр делгрҗәдг бүрдәциг чадмг кевәр һардҗ, олнд үлгүр болна гив. «Делгрлтин күчн» гидг олна җисәнә зура таңһчин Олна палатын төсвслә болн көтлврмүдлә ирлцҗәнә, тегәд эрк биш харһҗ хамцу үүлдврин тускар күүндх кергтә гиҗ шиидвидн. Богатовихнә өрк-бүл олн җилдән Хальмг Таңһчд бәәнә, Михаил Александровичд арһлачнриг, бәәрн әмтиг үүмүлҗәдг төрмүд өөрхн болдгнь маһд уга, гиҗ Батыр Иванович келв.
Таңһчин ачта улсин Хүүвин седвәрәр бүрдәгдсн олна җисә һардхиг даалһснь ик дааврта болв гиҗ Михаил Богатов темдгләд, моһа сарин эклцәс авн райодар йовҗ, әмтнлә кесг харһлт давулснаннь тускар хувалцв. Селән һазрт бәәдг арһлачнрла, фермермүдлә, ачта болн күндтә медәтнрлә харһад, бәәрн һазрин делгрлтд туслх бүрдәцсин туск төрмүдәр күүндсән эн келв. «Район болһн эврәһәрн онц йилһвртә, ямр нег үүлдвр делгрүллһнә төлә сән таалта болна. Тиигәд, Сарпан районд тәрә тәрлһнә болн бод мал өсклһнә кергүд сән йовудтаһар делгрҗәнә, тегәд тенд теерм тосхх, һуйрин кегдлмүд кеҗ һарһдг, мах эд-бод кедг бүрдәцс секх кергтә. Хар Һазра районд бас мал бордҗ, махна зүүтә хот-хол кеҗ һарһдг бүрдәц секч болхмн. Мах, буудя, темс эд-бод кедг бүрдәцс секхин төлә мөңг альдас авхмн гисн сурвр үүдхнь лавта. Ода Әрәсән залвр «Производственная ипотека» гидг көтлвр белдҗәнә, тегәд арһлачнр шаңһа дем авч чадхмн. Дәкәд район болһнд баһ бизнес дөңнлһнә саң бүрдәх күсл бәәнә. Ода бидн таңһчин экономикин болн хулд-гүүлгәнә министерствлә хамдан альд ямр бүрдәц секхин тускар күүндҗәнәвидн. Бидн эврә эдл-ууш кеҗ һарһад, терүг олзта-тустаһар хулдад, бәәрн арһлачнриг дөңнх зөвтәвидн», - гиҗ Михаил Александрович ухан-тоолврарн хувалцв.
Харһлтд орлцсн цергә шишлң керг-үүлдврин ветеран, фермер Хулхачин Һәрә, «Медрл» ниицәнә таңһчд үүлддг әңгин һардач Манҗин Элеонора, Әрәсән юристнрин ниицәнә таңһчд үүлддг әңгин ахлач Анастасия Кравцова болн нань чигн улс босхгдсн төрмүдәр ухан-тоолврарн хувалцҗ, таңһчин экономик делгрүллһнә төлә көдлмшч эрдмтә мергҗлтнриг белдлһнә, бәәрн эдл-уушиг орутаһар хулдхин төлә таал тогталһна, талдан балһсдт көдлҗ йовдг нег һазра улсиг эн кергт орлцуллһна төрмүд босхв. «Делгрлтин күчн» олна җисән күцәмҗтәһәр үүлдҗ, таңһчин экономик делгрүллһнд туслх төсвс күцәҗ, бәәрн арһлачнрт нөкд болтха гиҗ харһлтд орлцачнр темдгләд, зуралсн тоотнь эрк биш күцтхә гиҗ цаһан седкләсн дурдв. Таңһчин Олна палат «Делгрлтин күчн» җисәнлә хамцу үүлдҗ нөкцлтән батрулхин тускар үгцв.
ДООҖАН Наталья
ЗУРГТ: харһлтын кем

Видео