Партин гешүд күцәсән ашлад, иргч зураһан батлв

Сегодня, 15:42 | Общество, Таңһчин зәңгс, Зіњг

Мөчн сарин 9-д Элстдү«Негдсн Әрәсә» партин Хальмг Таңһчин әңгин хург болв. Энүг нүр үгәр таңһчин Толһач, партин таңһчин әңгин сегләтр Хаска Бату секв. «Мана партин гешүд урдк кевәр таңһчин делгрлтин төлә цуцрлтан угаһар көдлҗ, әмтнә бәәдл-җирһл ясрулҗ, эврә зурасан теднә некврлә ирлцүлҗ үүлдх гиҗ Бату Сергеевич темдглв.
Цааранднь цергә даалһвран күцәҗ йовад Әрәсән Баатр, ах лейтенант, зөргтә цергч, мана һазра күн Очр-Һәрән Нарн цергә шишлң керг-үүлдврин йовудт әмнәсн хаһцсна тускар келв». Тернь цуг мана таңһчин төлә һашута йовдл болв, Әрәсән кесг регионас һундл төрҗәдг суңһугуд ирҗәнә. Күүкдән өскәд, экдән килмҗән тусхаҗ, итклтә үр-нәәҗ олнд сән үлгүр болҗасмн. Орн-нутгин телеүзлин седкүлчнр мана тал ирҗ, Нарн Алексеевичин тускар ахр фильм цокч авв.
Зөргтә офицер батальона командирин дарукин даалһвран үзмҗтәһәр күцәҗәлә. Төрскн таңһчдан чигн үнн-чик седклтәһәр көдлҗ, олнд тусан күргҗ йовх бәәсмн. Болв, - намаг үүрмүдм күләҗәнә, - гиҗ келсмн. Тиигҗ дәәчин даалһвран әмән әрвллго күцәҗ йовла» - гиҗ таңһчин Толһач келв. Дарунь цуглрсн улс зөрмг цергчин санлынь күндлҗ тагчг зогсв.
Терүнә хөөн хургин ахлачд Хаска Бату, сегләтрт Чиңһс Ефремов суңһгдв, «Негдсн Әрәсә» партин Хальмг Таңһчин әңгин сегләтрин дарук Путян Байр болн таңһчин Улсин Хуралын (Парламентин) Ахлач Артем Михайлов президиумд орв.
Хургин эклцәр партин шин гешүдт таңһчин Толһач билетмүд бәрүлҗ өгв. Тиигәд ДДТ-н һардачин дарук Ванькан Нина, «Бидн хамдан» гидг таңһчин волонтермудын негдлтин ахлач Шахныка Татьяна, таңһчин профсоюзмудын Федерацин ахлач Александр Шеметов болн нань чигн шин гешүд партин зергләнд орв.
Тер мет партин зокалла ирлцәтәһәр таңһчин әңгин региона политсоветин болн Президиумин ханяс зәрм гешүд һарһгдв, теднә ормд шин улс суңһгдв. Тер тоод нуувчар дууһан өгснә хөөн партин әңгин Президумин ханьд Александр Ким болн Бембин Евгений орв.
Цааранднь «Негдсн Әрәсә» партин таңһчин әңгин сегләтр Хаска Бату күцәсн үүлдврин тускар келҗ өгв: «Одахн партьд Әрәсән Орн-нутгин Хүүвин депутатнрин кандидатнриг урдаснь суңһлһна керг-үүлдвр болв. Нег ормд 13 кандидат хоорндан марһлдв, теднә төлә 21 миңһн күн дууһан өгв. Тиим кевәр таңһчин улс эврә хәләцән медүлв. Ашлгч шиидвриг «Негдсн Әрәсә» партин съезд батлх зөвтә.
Урдаснь кесн партин суңһврт Элст балһсна Хургин депутат Чумуда Николай болн Улсин Хуралын (Парламентин) депутат Михаил Богатов диилвр бәрв. Таднд Хальмг Таңһчин иргнмүд нәәлҗәнә, кесгтән хаһлгдад уга кесг төр күцәҗ чадхит гиҗ тоолҗана. Хальмг Таңһчин әмтнә җирһл ясруллһна бат ул-сүүр тогтатн, дааврта хәләцән чаңһатн, гисн селвг өгхәр бәәнәв.
Усна сурвлҗс, электросетьмүд тосхлһна, селәнә эдл-аху делгрүллһнә халхар баһ биш көдлмш күцәҗәнәвидн, эн туст маднд орн-нутгин һардвр дөңгән күргҗәнә, АПК-н халхиг өдгә цагин некврлә ирлцүлҗ шинрүлх зөвтәвидн. Зуульчллһн мана таңһчд өргнәр делгрҗәхинь онц темдглх кергтә.
Цуг сурһульмудын ик зууднь шинрүллһнә көдлмш күцәгдв, эн җил 6 бичкдүдин садт бат ясвр кегдх. Арһлачнрин җисәг цааранднь делгрүлх кергтә, эдн мана бәәдл-җирһл ясрулх зөвтә. Маднд шин инвестормудыг олҗ авад, нөкцлтән улм өргҗүлх кергтә. Керг амр биш болсн бийнь, терүг хаһлх эв-арһс олҗ, өмәрән зөрх зөвтәвидн. Партин гешүдин, суңһврин дииләчнрин дөң-нөкдәр темдглсн тоотан күцәх зөвтәвидн.
Басан Бадьминович Городовиков эн туст маднд сән үлгүр үзүлҗ йовла, терүнә эс күцәсн кергиг цааранднь давулҗ, таңһчан делгрүлх зөвтәвидн. Эн туст Хальмг ик сурһульд селәнә эдл-аху, мал өсклһнә керг делгрүллһнә халхар ик көдлмш кегдҗәнә. Шүүҗ авсн хаалһар йовад, «Негдсн Әрәсә» партин ханьд күслдән күрх зөвтәвидн», - гиҗ Бату Сергеевич үгән ашлв.
Таңһчин цецгәрлтин төлә бидн арһ-чидлән нөөлго көдлхвидн, райодт көдлмшч ормс икдүлҗ, әмтнә җирһлин чинр өөдлүллһнд нилчән күргхвидн, гиҗ партин суңһврин дииләчнр Чумуда Николай болн Михаил Богатов эврә үгдән темдглв.
-Элстд болн райодар үүлдҗәдг цуг әңгүдт партин суңһвр дигтә-даратаһар бүрдәснд ханлтан өргҗәнәв. Күндтә дииләчнр, тадниг таңһчин олн улс дөңнҗәнә, таңһчин әңгин гешүд таднд иткҗәнә, - гиҗ Улсин Хуралын (Парламентин) Ахлач Артем Михайлов күүндврт орлцв.
Энүнә дару съездин көдлмшт орлцх хойр делегат суңһгдв, партин гешүд Чумуда Николайин болн Михаил Богатовин төлә цуглрсн улс дууһан өгв. Тер мет таңһчин Толһач Хаска Бату, Путян Байр, Дмитрий Медведевин приемна һардач Хаалһин Очр партин таңһчин әңгин делегацин ханьд орв.
ТҮРВӘН Һуна

Видео