Тульск мүҗин делегац Хальмгт ирв

Сегодня, 15:43 | Общество, Таңһчин зәңгс, Зіњг

Хальмг Таңһчин һардвр Әрәсән кесг регионмудла экономикин делгрлтд туслх нөкцлтин бооцас батлҗана. Одахн Санкт-Петербург балһснд болсн экономикин нарт-делкән ик хургин йовудт Хальмгин залврин Ахлач Босхмҗин Гилән Тульск мүҗин губернаторин түрүн дарук – залврин Ахлач Михаил Пантелеевла харһад, экономикин, зуульчллһна, спортын, сурһуль-эрдмин болн талдан халхсар нөкцлтхәр күүндсн билә.
Тульск мүҗд «Узловая» нертә экономикин өвәрц бүрдәц арвн җилдән күцәмҗтәһәр көдлҗәнә. Хулд-гүүлгәнә, тосхлтын, селәнә эдл-ахун болн талдан кесг халхар төсвсиг күцәҗ делгрүлҗәнә. Тегәд эн бүрдәцин дамшлтыг оньгтан авч Хальмгт олзлҗ болхмн гиҗ тер күүндврин йовудт темдглгдв. Терүнәс нань сойлын болн сурһуль-эрдмин халхсар хамцу төсвсиг күцәхәр бас күүндвр һарв. Хойр региона музеймүд, сойлын коллективс дамшлтарн хувалцад, нег-негндән гиичд одад, билг-эрдмән үзүлҗ чадхмн. Терүнәс нань ик сурһульмудын хоорнд нөкцлтән бас делгрүлх күсл бәәнә. Немхәс, тер һазра һардвриг Элстд одахн тосхгдсн агропромпарк бас соньмсулв.
ПМЭФ-ин йовудт күүндсн төрмүдәр нөкцлтин бооцас батлхар өцклдүр Тульск мүҗин губернатор Дмитрий Миляевин һардврт делегац Хальмгт ирв.
Үлмҗ өдрлә Улсин Хуралын (Парламентин) Ахлач Артем Михайлов болн таңһчин залврин Ахлачин дарукс Шурһчин Очр болн Этән Алексей күндтә гиичнриг тосад, хамдан «Мөңк һал» бумблвд одад, Төрскнәннь төлә әмән өгсн дәәчнрин санл тевчәд, гүрмр цецгүд тәвв (зургт). Тер мет Баатрмудын Аллейд Басан Бадьминович Городовиковин бумбин шидр Әрәсән Баатр Очр-Һәрән Нарна зург тал өөрдәд, санлынь бас тевчв. Дарунь Бурхн Багшин Алтн сүмд одад, төв хурлын болн шар шаҗна тууҗла таньлдсн болдг. Эн өдрин йовудт Әрәсән Баатр Лиҗин Мингияна нер зүүҗәдг «Дәәч» төвд ирсн гиичнриг Хальмгин залврин Ахлачин дарук – то-дигин делгрлтин министр Этән Алексей болн төвин һардач, цергә шишлң керг-үүлдврин ветеран Җаңһан Чимид тосч авв.
Тульск мүҗин делегац дәәнә ветеранмудын таңһчин шин госпиталин, Фиджитал-төвин, Агропромпаркин үүлдврлә бас таньлдв. Б.Б.Городовиковин нертә Хальмг ик сурһулин шишлң лабораторьт хальмг номтнрин күцәҗәдг көдлмш гиичнриг зөвәр соньмсулв.
Эн өдрин йовудт болсн наадк керг-үүлдврмүдин тускар даруһас тодрхаһар зәңглхвидн.
ОЛЬДАН Цаһан

Видео