Әрәсән күчиг темдгләд

Сегодня, 15:46 | Общество, Таңһчин зәңгс, Зіњг

Мөчн сарин 12-т мана орн-нутгт хамгин чинртә байр – Әрәсән Өдр темдглнә. Һучн дөрвн җилдән эн сән Өдр орн-нутгт бәәдг олн келн-улсиг хамцулҗ, мана тугин, сүлдин болн частрин чинр олнд медүлҗ өөдлүлнә.
Әрәсән Президент Владимир Путинә зәрлгәс иштә улсин ниицлтин җил зарлгдв, тегәд Әрәсән Өдрин чинр улм темдгтә болҗана гих кергтә.
Өдгә цагт Әрәсән ханьд ут тоодан 89 регион орна. Әрәсән иргн болһн эврә онц зөвтә, эннь орн-нутгин Конституцд – Һол заканд батлгдсн бәәнә. Эн өдр цаһан, көк болн улан өңгтә мана туг эргндән делснә.
Москва хотл балһснд соньн олн керг-үүлдвр бүрдәгднә. Улан талвңд орн-нутгин сойлын нертә үүлдәчнрин орлцлһтаһар байрин концерт болна. Тогтсн авъясар Кремлин бәәшңд номин, билг-эрдмин болн талдан олн халхар күцәмҗ бәрсн улсиг шаңһа ачлврмудар темдглнә.
Маңһдур Элстд болн таңһчин райодт ирлцңгү керг-үүлдврмүд бас давулгдхмн. Байрин концерт хәләһәд, спортын марһаст нег һазра улс орлцҗ чадхмн. Тер мет баһчудын олна бүрдәцс арвтнрин төлә төрскнч сурһмҗ өглһнә керг-үүлдврмүд бас давулхмн. Арвн дөрвтә көвүд-күүкдт эн өдр паспорт бәрүлҗ өггдхмн.
Эндр Әрәсән Федерацд 190 һар келн-улсин элчнр ниитәһәр, ахнр-дүүнр мет бәәнә. Өдгә амр биш цагт цергә шишлң керг-үүлдврин йовудт орн-нутгин хәәртә үрд олна кергин төлә дәәлдҗәхинь бас онц темдглх кергтә. Сүл җилмүдт делкә, тер мет мана орн-нутг олн халхсар делгрәд, хүврәд йовдг ашт эн өдрин чинр улм өсчәхиг герчлнә. Өөрдҗәдг Әрәсән сән Өдрлә нег һазра улсан йөрәһәд, цугтан эвин таалд бәәһәд, үрдән өскәд, орн-нутгин, нег үлү төрскн таңһчин делгрлтд ач-тусан күргәд йовхитн дурдҗанавидн!
КАРСАНА Евгения

Видео