Хальмг дууч - Сербийд

Сегодня, 12:22 | Общество, Таңһчин зәңгс, Зіњг, Сойл

Ниш нертә сербск балһснд ах-дү болсн балһсдын түрүн наадм өргмҗтә бәәдлд давв. Улсин хоорндк сойлын залһлда батллһнд нилчән күргх эн наадм орн-нутгуд нөкцҗ үүлдлһнә талвң болх гисн күслтәһәр кегдсн мөн.

Энд нег талвңд Әрәсән, Беларусин, Китдин, Болгарин, Грецин, Боснийин болн Герцеговина, нань чигн орн-нутгудын үүдәгч коллективс болн дуучнр харһҗ, билг-эрдмәрн әмтиг байрлулв. Кесг нутгас ирсн билгтнр эврә һазрин авъясмудла цуглрсн әмтиг таньлдулад, хоорндан эрдмин дамшлтарн хувалцад, хамцу төсвс күцәхәр үгцв.
Хальмгин делегац эн байрин үүлдврт орлцснь темдгтә болв. Мана делегацин ханьд йовсн «Бамб цецг» ансамблин дууч Босхмҗин Диана теегин һазрин сойлыг билгтә кевәр үзүлҗ чадв. Хальмг Таңһчин ачта артисткин келсәр, Сербийд болсн байрин үүлдврт орлцлһн энтн йирин йовдл биш мөн. Энтн ик чинртә болн дааврта үүлдвр болв. «Нарт-делкән талвңд һарч билгән үзүлнә гисн талдан һазрт бәәдг улсиг мана таңһч соньмсулҗ, оньган өгдг таал тогтана. Дууна болн бииһин дөңгәр мана һазрин улсин байн зөөриг болн өвәрц авъясмудыг үзүлхәр зүткнәвидн», - гиҗ Босхмҗин Диана тоолврарн хувалцна.
Сербин хәләһәчнр хальмг дуучиг бүләнәр тосв. Байрин керг-үүлдврин бүрдәһәчнр чигн хальмг артисткин билгиг өөдәнәр үнлв.
ҖИРҺЛИН Кермн

Видео