Дәәчнр-ветеранмудын төлә бүрдәсн сурһуль

Сегодня, 14:04 | Новости, Таңһчин зәңгс, Зіњг

Одахн Хальмг ик сурһульд цергә шишлң керг-үүлдврин ветеранмудын төлә «Баатрмуд-08» төсвин ирлцңгү көтлврин кичәлмүд төгсв. Залврин халхар кесг төр эдн багшнртаһан хамдан шинҗләд шин медрл авв.
Хальмг ик сурһулин багшнр, таңһчин зака үүдәгч болн күцәгч йосна бүрдәцсин һардачнр болн көдләчнр шинҗләчнрин комиссин ханьд орв.
Президентин академин ВШГУ-н көтлврин һардач Надежда Кононенко коллективиг һардлһна эв-арһиг, нүүрләчнрин авциг яһҗ делгрүлхин тускар лекцс умшсна ашт хоршасн шин медрлнь нег үлү кен-негнднь туста болсинь заахмн.
Финансин халхар әәмшг уга бәәдл тетклһнә төрәр Келн-улсин банкин Хальмг Таңһчин әңгин элч Елена Петрушкина цәәлһвр өгв. Ирлцңгү төр өдгә цагт ик чинр зүүнә, тегәд эннь ветеранмудыг икәр соньмсулв.
Хальмг ик сурһулин «Гармония» төвин һардач Бардан Нина психологийин халхар төсвд орлцачнрт селвгән өгв.
– Ода мана көтлврт орлцачнр коллективиг, бүрдәциг залллһна халхар кесг эв-арһ дасч авад, хоорндан чигн үр-иньглгч хәрлцә тогтаҗ, ниитәһәр көдлх баг бүрдәв, – гиҗ Нина Аркадьевна келнә.
Тер мет Президентин медлд үүлддг РАНХиГС-ин академийин шинҗләч Станислав Романенко бас төсвд орлцачнрин болн теднә сурһулин тускар тоолврарн хувалцв. Номт йириндән бүрдәцсиг болн залачнрин баг делгрүллһнә төрәр медрл өгнә. «Кен-негнәннь җирһлд олн зүсн йовдл учрна, тер таалд чик шиидвр батллһна тускар цәәлһвр өгләв. Шаңһа көдлмшт болн онц эзнә үүлдврт һардач күн кезә чигн кесг төр хаһлна. Тер төриг тогтсн бәәдллә ирлцүлҗ оньгтан авад, залач-һардач чик шиидвр батлх зөвтә.
Цергә шишлң керг-үүлдврин ветеранмуд урднь чигн эднә көдлмшт учрсн йовдлын тускар келнә. Терүгинь шинҗләд, чик хәрү олҗ авгдна, – гиҗ эн шинҗләч келв.
Кичәлмүдин завсрт «Баатрмуд-08» көтлврт орлцачнр Хар Һазра района Адг селәнд одад ирв, энд селәнә эдл-ахун болн экономикин халхар хоршасн баһ биш дамшлтла таньлдв. Хальмг Таңһчин Баатр Болдра Валерий кесг җилин туршарт эн эдл-ахуг чадмгар һардҗ йовла, ода Хар Һазра района толһачар үүлдҗәнә.
«Первомайский» СПК-д селәнә эдл-ууш эд-бод келһнә цех көдлҗәнә, энд үкрә мах олзлад, консерв кеҗ һарһад, цуг райодыг, СВО-д орлцҗадг мана дәәчнриг чигн теткнә, тиим кевәр эдл-ахуд олз-оруһан икдүлҗәнә.
– Мана селәнә сойлын Гер, бәәрн хурл, Диилврин парк хальмг улсин авъясиг хадһлҗадг кезәңк хальмг хотна җирһл гиичнрт үзүлләвидн. Ода мана селәнә уульнцсиг урһа модд кеерүлҗәнә, тегәд сән кец-таал тогталһна көдлмш цааранднь делгрүлҗәнәвидн. Нег үлү ода зуульчнр хальмг улсин хотна кезәңк бәәр хәләхәр олар ирнә, – гиҗ Адг селәнә муниципальн бүрдәцин толһач Мерглчин Байрта келнә.
Нүүрлгч эдл-ахуд үзсн-соңссн тоотыг «Баатрмуд-08» төсвд орлцачнр эврәннь иргч үүлдвртән чигн олзлад бәәх гиҗ сангдна, сурһулин чилгчәр ашлгч шүүврән өгснә хөөн эдн эврә төсвән белдҗ харсх зөвтә. Хальмг ик сурһулин багшнр теднд дөңгән күргх, дәәч-ветеранмудын төсвс аш сүүлднь таңһчин делгрлтд туслх гиҗ иткхмн. «Баатрмуд-08» төсвд орлцачнр шүүврән өгәд, сән медрл хоршасан герчләд, хөөннь таңһчин болн бәәрн йосна бүрдәцст көдлҗ чадх болна.
Ирлцңгү көтлвр күцәлһнә йовудын тускар СВО-н ветеран Бегләтин Анатолий иигҗ келв: «Энд хамгин амр биш тоот хәләгдв, тер тоод финансин болн зәңгллһнә туст әәмшг уга бәәдлин, шин эв-арһсин, банкин үүлдврин туст учрдг йовдлмудыг гүүнәр шинҗлҗ, ирлцңгү медрл дасх кергтә болв. Шинҗләчнр болхла некврән чаңһаҗ мана медрл сөрв. Тернь мел чик».
Сурһуль бүрдәсн Хальмг ик сурһулин багшнрт ханлтан өргҗәнәвидн. Хоршаҗ авсн медрл иргч дааврта көдлмшт эрк биш туслх, гиҗ талдан орлцачнр чигн тоолвран келв.
Тиим кевәр дәәч-баатрмуд цергә үүлдврт залу-зөрмгән үзүлсн деерән көтлврин йовудт чигн даавртаһар үүлдҗ эднд кергтә медрл хоршав.
ТҮРВӘН Һуна

Видео