Җаңһрчнрин сурһульд

Улсин үүдәлтин таңһчин Герт (РДНТ) җаңһрчнрин сурһуль көдлмшән эклв. Эн бүрдәцд көдлҗәдг мергҗлт Тербатан Очр иим сурһуль секлһнә седвәриг таңһчин сойлын болн зуульчллһна министерств дөңнсмн. Җил хооран «Сумеру» гидг олна бүрдәц министерствин дөңгәр таңһчин зурһан районд «Җаңһриг» олнд дуулҗ өглһнә асхд бүрдәсн билә, тер көдлмшт Тербатан Очр орлцҗ йовла.
Эн керг-үүлдвриг таңһчин сойлын болн зуульчллһна министрин дарук Санҗрһа Герман һардҗ, нөкд болсмн. Нидн һаха сард жаңһрчнрин сурһуль секх селвг түрүн болҗ үүдсмн. РДНТ-н һардач Тачин Җирһл эн төрт орлцад, улсин үүдәлтин Герин улд җаңһрчнрин сурһуль сексмн. Ода энд билгтә бичкдүдиг баатрлг дуулврла таньлдулҗана. Эн сурһулиг һардҗадг Тербатан Очр бийнь эврә цагтан җаңһрч Шавалин Даван дууллһна янзар мергҗлт авсн болдг.
Баатрлг дуулврмудыг даслһна болн терүг олнд цәәлһлһнә тускар Альберт Лорд бичсн дегтрлә таньлдҗ сурһулин кичәлмүд эклв. Тууҗлгч дуулвриг олнд медүлсн цагтан үгинь тер кевәрн давтҗ дуулсн деерән үүлдврин учр-утхинь медүллһн ик чинртә болдгиг номтын дегтр герчлҗәнә.
«Җаңһриг» даслһна йовуд удан болх гиҗ Тербатан Очр тоолвран медүлв. Арднь орҗ эс дасхла керг бүтшго.
Ода деерән эн сурһульд сурхар 11 күн эрлһән орулв. Сурһуль сурчадг дөрвн бичкн баатрлг дуулвр дасхар шиидснь бас соньн гих кергтә. Келмрчнрин зергләнд орх саната улс ода деерән баһ бәәдлтә.
Келмрч болх седкл зүүһәд ирсн улсиг дарани нег багд орулх зура бәәнә. Кичәлмүд бүкл багд чигн, онц күүнлә чигн кегдҗәхмн. Эн туст көгҗмин эс гиҗ дууна белдвр керг уга. Эврә келн-улсин дуулвр соньмсулсн улс терүг сәәнәр дасч авхмн.
Мана улс эврә амн үгин зөөрәр соньмсад, «Җаңһр» дасх улсин то өсәд бәәхлә сән болхмн, - гиҗ Тербатан Очр тоолврарн хувалцна. – Ах болн дунд үйин улс эн төрт оньган өгсн болхла цугтад сән үлгүр болхмн. Эн кичәлмүд өңгәр давулгдхмн. Җаңһрчнрин сурһуль секлһнд дөңгән күргсн цуг улст үнн седклин ханлтан медүлҗәнәв».
Келхәс, җаңһрчнриг белдлһнә сурһуль Шинҗәнд өргнәр делгрҗәхнь темдгтә. Тенд эн туст баһ биш дамшлт хоршагдсна тускар тиигәрән одсн номтнр, седкүлчнр келнә.
Өвкнрин үнтә зөөриг олнд күргҗ медүллһнд, тер зөөриг дасч келмрчнр болх мергҗлтнриг белдлһнд иим оньг өггдҗәхнь байрта. «Җаңһр» улс дунд келгдәд, дуулгдад йовхла, улсин цецн зөөр мартгдшго, үйнрин хоорндк залһлдан батрад, хальмг келнә көрң нег үлү байҗхнь маһд уга.
ҖИРҺЛИН Кермн