Суңһврин керг-үүлдврмүд эклҗәнә

Мөчн сарин 16-д Әрәсән Президент Владимир Путин шишлң зәрлгәр эн җил Орн-нутгин Хүүвд болх суңһврин өдр батлсн билә. Мана таңһчд ирлцңгү керг-үүлдвр эклҗәхинь темдглхмн. Эн туст дааврта улс ухан-тоолврарн хувалцв.
Хальмг Таңһчд суңһвр бүртклһнә штабин болн Олна палатын һардач Мучан Батыр:
«Шидр Әрәсән Президент Владимир Путин Орн-нутгин Хүүвд болх суңһврин туск шишлң зәрлг батлв. Эн җилин һаха сарин 20-д тернь болхмн. Заканла ирлцәтәһәр, суңһврин туск зәрлг дааврта кем эклхәс 110 өдр урд батлгдх зөвтә.
Тиим кевәр суңһврин керг-үүлдвр эклсн бәәнә, энүнә ашт 225 күн нег мандатын, 225 күн болхла орн-нутгин суңһврин дуһргар, ут тоодан 450 депутат суңһгдхмн.
Шаңһа заканла ирлцәд, мана таңһчд 18-ч тойгта нег мандатын суңһврин Хальмг дуһрг бүрдәгдв.
Суңһврин Төв комиссин то-дигәр, мана орн-нутгт ут тоодан ирлцңгү 2,2 миңһн керг-үүлдвр давхмн, терүнә йовудт 20,7 миңһн депутат суңһгдхмн. Хальмг Таңһчд суңһвр бүртклһнә штаб чинртә керг-үүлдвр давуллһнд белн бәәнә».
Хальмг Таңһчд суңһвр бүртклһнә штабин гешүн, Хальмгин профсоюзин Федерацин ахлач Александр Шеметов:
«Суңһврин өдр батлгдв, ода болхла партьсин гешүд, кандидатнр, комиссин элчнр дааврта көдлмшән эклх зөвтә. Әрәсән зака үүдәгч Хург 450 депутатас тогтна, өрәлнь нег мандатын дуһргар, наадкснь партьсин то-дигәр суңһгдна. Суңһврин ашар хамгин олар дөңнсн кандидат диилвр бәрнә, то-дигәр болхла суңһачнрин 5 процентнь дууһан өгх зөвтә болна. Суңһврт партьсин болн эврән бийән заасн элчнр орлцҗ чадҗана.
Суңһврин дааврта кемд Элст балһснд нег мандатын 3-ч болн 5-ч тойгудта дуһргудар Элстин Хургт немр суңһвр бас болхмн. Олна штабин элчнр Әрәсән Орн-нутгин Хүүвин, тер мет ЭГС-ин чигн суңһврт белдҗәнә.
ОЛЬДАН Цаһан