Бадм цецгин наадмд белдҗәнә

Җил болһн ноха сарин эклцәр Көк теңгсин көвәд бәәршлҗәдг лаганяхн бадм цецгин наадм өргмҗтәһәр давулдгнь ода сән авъяст тохрв. Эннь өдгә цагт Хальмгт зуни кемд бүрдәгддг зуульчллһна халхар һоллгч йовдл болҗана, гиҗ өгҗәллһн угаһар келҗ болхмн. Тегәд эн җилин наадм юуһарн өвәрц болхмн гихлә, энүнд сойлын, спортын, эргндк бәәдлин болн зуульчллһна төрмүд негдҗ үзүлгдх болҗ һарна. Йириндән болхла шар шаҗнд шүтдг улсин төлә әрүн чинртә эн цецгин сәәхн үнр эргндән каңкнад, өврмҗтә бәәдл тогтана эсий?! Басл сүркә юмн гиһит!Эн района Җалһан нертә селәнә шидр усн дотр урһҗадг бадм цецгиг һәәххәр кесг һазрас олн зуульчнр ирдг болв.
Сүл өдрмүдт лаганяхн энд- тендәс ирх гиичнртән сән таал тогтаҗ, бүләнәр тосхин төлә района төвд болҗадг олна субботникүдт шунмһаһар орлцҗана. «Йириндән җил болһн һаза дуларад, хавр ирхлә, паркст, хаалһсин хаҗуһар, олна ормст, балһсна уульнцсар чигн хог- бог зөөҗ һарһгдна, альднь чигн цевр-цер бәәдл тогтагдна, -гиҗ Лаганя района толһачин дарук Ирина Козловцева келнә. -Эн җилин хаврар дару- дарунь хур- чиг орсна ашт буг өвсн нигтәр һарад, йовһар йовдг әмтнд чигн харшлтан күргҗәнә. Тегәд олна субботникүдт «Коммунальник» МАУ-н көдләчнрәс нань олна бүрдәцсин элчнр, бәәрн улс чигн орлцҗ, өвс хадад, шишлң ормд зөөҗ һарһад, эргндкиг цеврлҗәнә».
Нег үлү удлго, эн долан хонгин чилгчәр Лаганя районд регионмудын хоорндк наадм эклхмн, эзн күн гиичнрән гертән орулҗ авхас урд төгәлңдән дигтә- дарата бәәдл тогтадг биший. Тегәд шидрхн бәәрн хурлын болн Будда Бурхна бумблвин эргнд болсн олна субботникд сурһуль- эрдмин болн сойлын бүрдәцсин, района болн балһсна һардврин элчнр, социальн көдләчнр болн волонтермуд орлцсиг заахмн. Буг өвс хадад овалад, хог- бог зөөҗ һарһад, энд урһҗадг зер- земшин модд услад чигн цугтан сәәнәр көдлв.
Җалһан нертә селәнд бас бадм цецгин наадмд ик белдвр кегдҗәнә, бәәрн заһсчнр, онһцсин эздүд ирлцңгү көдлмшт орлцҗахинь темдглхмн. Бадм цецгүд урһҗадг усна көвәһәр, селәнә төвд болн әмтн өөмдг ормд цевр- цер бәәдл тогтагдв. Социальн көдләчнр болхла Хальмгин сойлд шар шаҗна чинрин туск экскурсьт зуульчнр олар ирдг бәәрн Галсанг хурлын хашаг ясад, һаза- дотакинь цеврләд, ширдәд бел кев.
Тиигәд ноха сарин 8-9-д, Лагань балһснд болн Җалһан нертә селәнд олна орлцлһта соньн кесг керг- үүлдвр болх гиҗ наадмин бүрдәһәчнр зәңглҗәнә. Келхд, бембә өдр асхлад һаза невчк серүцхлә, усн дотр байрин бәәдлд бадм цецгин наадм секгдхмн. Өрүн эртәс авн болхла спортын кесг марһас, усна көвәд олн зүсн наадн бүрдәгдх, «Нортон» багин концертд чигн олн хәләһәчнр цуглрхмн. Эн өдр Жалһан нертә селәнд ирсн гиичнр «Цевр көвә» гидг марһанд орлцх, Галсан хурлд одад, тенд үзүлгдҗәдг хамг тоотыг һәәххмн. Иигәрән ирсн улст шар шаҗна туск соньн лекц умшгдхнь бас кен- негинь соньмсулхнь лавта. Асхарнь әмтн һаза серүнд кино хәләһәд, сергмҗтәһәр амрхмн.
Маңһдуртнь, ноха сарин 9-д болхла, Лаганьд урн һарин эрдмчнрин кегдлмүдин һәәхүл секгдх, сапсерфингәр соньн марһан болх, нарт- делкәд кесг дәкҗ диилвр бәрсн Дмитрий Петров марһана һол зарһчд батлгдв. Энүнәс нань эн марһанд Әрәсән чемпионк Наталья Новицкая бас орлцҗахнь өврмҗтә йовдл болхнь маһд уга. Дәкәд эн өдр тод бичгин туск шишлң кичәл бас бүрдәгдхмн гиҗ зуралгдҗана. Эн өдрин асхарнь болхла, бадм цецгин наадмин ашлгч керг-үүлдврмүд болх, нәәрт ирсн әмтнә төлә «Хагрин» баг концертән үзүлхиг нег үлү баһчуд күләҗәнә гих кергтә. Җалһан нертә селәнд болхла, эн өдр нарн һарх алднд йоган эрдмчнр шишлң керг бүтәх, энүнәс нань эврә онһцста улс зуульчнрин төлә уснд соньн экскурсь бүрдәхәр зуралҗахиг бас темдглхмн. Селәнә төвд секгдсн талвңд хальмг бииһин болн домбр цокдг эрдмчнрин шишлң кичәлмүдт нег үлү ирсн гиичнр олар цуглрх гиҗ күләгдҗәнә. Дәкәд чигн одахн гилтә, така сарин эклцәр, Хальмгин автономин дарани өөнд нерәдгдсн байрин хургт таңһчин Толһач Хаска Бату «Җаңһр» алдр дуулврин Өдр батллһна туст сән седвәр татснла ирлцҗ, ноха сарин 9-д асхар нарн сууҗ йовх кемд селәнә һол талвңд «Җаңһрин» бөлгүд дуулҗадг келмрчнриг соңсч болхмн. Бадм цецгин наадм ашлад, «Теегин дун» гидг күүндврин йовудт бәәрн улс чигн, олн һазрас ирсн зуульчнр чигн ухан- тоолврарн хувалцҗ, ханлтын үгән чигн кен- негнднь нерәдҗ чадхмн.
Давсн долан хонгин чилгчәр болхла, Лаганя района толһач Коган Юрий бүрдәмҗин комитетин дарани сүүр давулҗ, белдврин көдлмш яһҗ давҗахинь бүрткв. Хамгин түрүнд эн өдрмүдт чигн олар ирҗәдг зуульчнрин төлә сән таал, әәмшг уга бәәдл тогтахар зүткҗәнәвидн. Эн кемд хамгин түрүнд хот- хоолын, эрүл-мендин бәәдл, олна диг- дара харлһна, бичкдүдин болн баһчудын төлә нәр- наадд давулдг бүрдәцсин дигтә- дарата көдлмшин туск төр хаһлҗанавидн, гиҗ Юрий Сергеевич келв.
Нег үлү хол һазрас, зәрмнь болхла нам Хальмгт түрүн болҗ ирҗәдг ик- баһ уга гиичнриг соньмсулх сойлын шишлң көтлвр белдгдҗәдг болна. Зуульчнр усн дотр урһҗадг бадм цецг тал күрхәр седхинь чигн тоод авч, шишлң ормд сән кец- таал тогтагдҗадг болҗ һарв. Тегәд Хальмгин болн Лаганя района нер һарһҗ, хәәртә , әрүн чинртә бадм цецгин наадмиг һәәхмҗтә йовдлд хүврүлхәр шунҗанавидн, манахст чигн, таңһчин гиичнрт чигн эн долан хонгин чилгчәр болх олна байрт ирҗ орлцхин туст үрвр кеҗәнәвидн, гиҗ наадмиг өөдән кемҗәнд давулҗ, дәкнәс төрскн нутгин нер туурулхдан белн бәәхән Коган Юрий иткүлв.
Шагҗин Любовь
Зургт: лаганяхн олна
субботникүдт орлцв