Эврә кергән делгрүлҗәдг баахн фермер

Сегодня, 13:26 | Общество, Таңһчин зәңгс, Зіњг, Селәнә эдл-аху, Современник

Манҗин Мергн (зургт) бичкнәсн авн хошт көдлҗәсн эцкдән болн авһдан нөкд болсн учрар малчнрин көдлмш сәәнәр меддмн. Ода баахн фермер эврә эдл-ахуһан һардҗана.
Авһнь Манҗин Николай Ик Буурла района Приманыч селәнд 1994 җиләс авн малын хошт көдлдг билә. 2024 җилд Мергн ач көвүнь «Өрк-бүлин ферм» гидг шаңһа көтлврт эрлһән орулад, 5 сай һар арслңга дем авв. Шаңһас авсн болн эврә мөңгән олзлад, эн мал борддг болн буудя хадһллдг бәәр экләд тосхв. Төмр турвас болн тосхлтын нань чигн тоот хулдҗ авад, эн көдлмшән эклв. Ода энүнә эдл-ахуд 300-400 тонн буудя хадһлдг бәәрн тосхгдв. Мал бордлһна төлә бас кергтә таал тогтагдв. Эдн 200 толһа бод мал бәрхәр зуралҗана.
- Намрар бәәрн малчнрас 30-50 эн җилә туһлмуд хулдҗ авад, бордхар бәәнәвидн. Эн җил 160 һар гектар аһу һазрт цаһан буудя тәрсн биләвидн, тегәд 200 тонн буудя цокч авад, үвлд белдвидн. Малд кергтә өвс бас белн бәәнә. Ниднәк өвс тоод авхла, һару угаһар үвлзлхд күртх гиҗ санҗанав. Мана эдл-ахуд техник, көлгн бәәнә, тегәд кеер өвс хадад, нааран зөөҗәнәвидн. Малын хошт эврә худг бәәнә, болв мал бордхин төлә ус хадһлдг сав углҗ тәвх кергтә, - гиҗ Мергн келнә.
Дунд сурһулян төгсәснә хөөн эн Хальмг ик сурһульд сурад, инженерин эрдмтә мергҗлт болв. Цергәс бууҗ ирәд, селәнә эдл-ахун халхар көдлхәр шиидв. Тегәд 2017 җиләс авн эн малын хошт көдлҗәнә. Эцкнь Санл Анджаевич дамшлтарн хувалцҗ медсән көвүндән зааҗ өгнә. Эцкин дөң-нөкд баахн фермерт ик урмд өгнә.
Нидн эдн 30 бүрү бордад хулдв, эн халхар дамшлт хоршав. Өдгә цагт эн керг олзта-орута болҗана гиҗ фермер тоолҗана.
- Селәнә эдл-ахуд көдлх санан бәәхлә, шаңһа көтлврмүд сәәнәр туслна. Хальмг Таңһчин селәнә эдл-ахун министерств шаңһа дем авч эс гиҗ онц зөвин таалд мөңг өгъәлҗ кергән делгрүлхд малчнрт болн тәрәчнрт нөкд болна. Бидн «Өрк-бүлин ферм» гидг көтлврт орлцад, шин хаша-хаац тосхвидн. Ода болхла мал бордлһна кергән цааранднь делгрүлх санатавидн. Төрскн һазртан бәәһәд, дорас өсч йовдг көвүдтән үлгүр болхар зүткнәв, - гиҗ Манҗин Мергн келнә.
Эк-эцкнь болн Валерия авальнь энүг дөңнҗәхнь бас ик урмд өгнә. Тавта Эсен болн һунта Ноян малын хошт дару-дарунь ирнә. Удл уга һурвдгч үрм һархмн гиҗ баахн эцк байрарн хувалцв, көвүднь сән нөкднр болҗ өсәд, мал асрлһна кергиг дасч авх гиҗ ицҗәнә. Тиигәд эцкәс көвүнд, үйәс үйд күргҗ өгсн медрл-дамшлт өрк-бүлин кергиг батрулхнь маһд уга.

ДООҖАН Наталья

Видео