Хальмг ик сурһульд оютнриг ачлв

Сегодня, 13:37 | Общество, Таңһчин зәңгс, Зіњг, Сурєуль-эрдм

Медрлин өдрлә Хальмг ик сурһулин багшнр болн оютнр алдр номт Зая-Пандитан бумбин өөр цуглрв.

- Хальмг улсин тод бичгиг үүдәсн Зая-Пандитан күргсн ач-тусинь күндлнәвидн. Моңһл үндстә болн нань чигн кесг келн-улс тод бичг өргнәр олзлҗ алдр дуулвран үүдәлә. Ода Зая-Пандитан кергинь Хальмг ик сурһулин номтнр, багшнр болн оютнр цааранднь давулҗ йовна, - гиҗ Хальмг ик сурһулин һардач Салан Бадм келв.
Энүнә хөөн ик сурһульд орсн оютнрт нерәдсн байрин хург болв. Эн җил 1800 арвт Хальмг ик сурһулин оютнр болв, тер тоод Әрәсән 25 регионас ирсн баһчуд бас бәәнә. Нарт-делкән спортын эрдмч, делкән марһана дииләч, багшин дацңгин оютн Һәрән Мингиян (зургт), Әрәсән спортын эрдмчнр, Европин марһасин дииләчнр Шуңһрцга Дорҗ болн Басңга Алтана өөдән күцәмҗ бәрсн төләдән ачлгдв.
Багшин дацңгин оютн Мария Лушниковад бас өөдән темдг бәрүлҗ өггдв, удл уга Марина Екатеринбургд болх баһчудын нарт-делкән наадмд орлцхмн. Бас эн дацңгин оютн Мөңкән Гилән Цугәрәсән марһанд диилвр бәрсн төләдән онц темдгәр ачлгдсн болдг.
Дарунь эн байрт орлцсн таңһчин Толһачин һардврин ахлач Кирилл Попов үг авч, мана таңһчд бәәдг эв-арһсиг өргнәр олзлх кергтә, тадна төлә цуг таал тогтагдв, тегәд уралан зөрҗ, таңһчан делгрүлх зөвтәвидн, гиҗ оютнриг йөрәв.
Тер мет Элст балһсна депутатнрин Хургин ахлачин дарук Чумуда Николай болн «Движение первых» таңһчин җисәнә ахлач Анхана Саглр медрлин өдрлә йөрәһәд, бүлән үгән келв. Кезә чигн медрл авхар зүтктн, бидн таднд дөң болад бәәхвидн, уралан йовдг хаалһтн цаһан болтха гиҗ эдн заав.
«Эврәннь таңһчдан сурхар седәд, Хальмг ик сурһулиг шүүҗ аввт. Тана күцәмҗ бахмҗ үүдәнә. Мана оютнр делкән болн Европин марһаст Әрәсән нер дуудулҗ диилвр бәрҗ йовна. Хальмг ик сурһуль Әрәсән сән гисн 100 вузин тоод орв. Тадн номин, сурһулин, спортын халхар ик күцәмҗ бәрҗ, мана ик сурһулин нер туурулад йовхд ицҗәнәвидн. Эн җил мана 23 оютн Әрәсән Президентин стипендь тер мет бас 23 күн орн-нутгин залврин Ахлачин стипендь авх болҗ йилһгдв. Тиим кевәр тадн Хальмг Таңһчин нер орн-нутгт дуудулҗанат», гиҗ Хальмг ик сурһулин һардач Салан Бадм оютнриг йөрәҗ темдглв.
Тер мет цугтаһаснь түрүлҗ эврә бәрмт цаасан Хальмг ик сурһульд орулҗ өгсн баһчудт эн хургт белгүд бәрүлҗ өггдв. Тедн дунд Дядин Даниил, Боган Оэлун болн Пачан Ляри заагдв. Цааранднь ЕГЭ-н шүүвр өглһнә ашар ик күцәмҗ бәрсн оютнр тоогдв. «Успешный старт» гидг төсвин йовудт ончрсн оютнрт сертификатмуд бәрүлҗ өгв. 90-әс авн 100 балл күртл хоршасн оютнр 100 миңһн арслңга мөрәһәр ачлгдв. Тер тоод Лиҗин Алтана болн Санҗин Айлана мөңгнә мөрәс авв. ЕГЭ-н һурвн шүүврин ашт 250 балл хоршасн оютнр 50 миңһн арслңга мөрәһәр ачлгдсинь бас темдглхмн. Тер тоод Алексей Грушев, Шалдуна Айлана заагдсмн. Терүнә дару Хальмг ик сурһулин профессор, филолог номин доктор Мушан Владимир ЕГЭ-н ашар 268 балл хоршасн Лиҗин Алтанад оютна дегтринь бәрүлҗ өгв. Дарунь негдгч курсин оютнр эврә андһаран өгв.
Үдин хөөн болхла Хальмг ик сурһулин эсвин, физикин болн зәңгллһнә эв-арһсин дацңд бат ясвр төгссн учрар байрин хург болв. Дацңгин дотрк бәәдлнь шинрүлгдҗ хүврв. Хальмг Таңһчин Улсин Хуралын (Парламентин) Ахлач Артем Михайлов болн Әрәсән Федерацин Хүүвин гешүн, сенатор Путян Байир, баһчудын кергүдин Хальмг Таңһчин агентствин һардач Натра Антон оютнриг йөрәһәд, Хальмг Таңһчин делгрлтд туслх эрдмәр гүн медрл авч, сурһулян сәәнәр суртн гиҗ дурдв.
Салан Бадмин келсәр, кесн ик кемҗәтә көдлмшин тускар келв. Әрәсән ик сурһулин болн номин министерств ясврин кергт 120 сай һар арслң һарһҗ өгсинь темдглв. Тиим көдлмш цаарандан чигн күцәгдәд бәәх гиҗ Бадм Катинович иткүлв.
Эдл-ахун көдлмшәр бәәдг эврә дарук Баатрин Эльзад болн объектиг олзлдг заллтын ахлач Санҗин Татьянад эн Күндллһнә һашгуд бәрүлҗ өгәд, ясврин көдлмшиг сән чинртәһәр күцәснд ханлтан өргв. Бат ясвр сурһулин таалыг ясрулҗахинь эн дацңгин һардач Сумьяна Елена келсн үгдән темдглв.

ТҮРВӘН Һуна

Видео