Шүлгч Саңһҗин Босян нерн зүүлһгдв

Сегодня, 13:52 | Общество, Таңһчин зәңгс, Хальмг Тањєчин Толєачин ґдр-бўр, Зіњг, Сурєуль-эрдм

Эн өдрин бийд Целинн района Троицкое селәнә дунд сурһульд хальмг улсин шүлгч Саңһҗин Босян нерн зүүлһгдснд нерәдсн байр болв. Хальмг Таңһчин Толһач Хаска Бату сурһульчнриг болн багшнриг йөрәхәр тиигәрән ирв. Хальмг Таңһчин сурһуль-эрдмин болн номин министр Александр Ким, Саңһҗин Босян күүкнь Татьяна Басанговна болн җичнь Саңһҗин Эрднь, Целинн района толһач Увшан Басң эн керг-үүлдврт орлцв.
Таңһчин Толһач харһлтын эклцәр Татьяна Басанговнад цецгүд белгләд, эн йовдл тана өрк-бүлин төлә бәәтхә, Целинн районд болн Хальмг Таңһчд чинртә болн темдгтә болҗана гиҗ темдглв. «Тадн экиннь үүдәлтин зөөриг әрүнәр хадһлҗ йовнат. Медрлин Өдрлә иим сән йовдл учрснь бахмҗта. Нертә мана шүлгч Саңһҗин Босян үүдәлтин зөөр ик чинртә болҗана», - гиҗ Бату Сергеевич келв. Селәнә сурһульчнрт онц үгән нерәдҗ, сурһулян сәәнәр сурсн деерән олна бәәдл-җирһлд шунмһа кевәр орлцҗ, седвәртә, шунлтта, төрскнч седклтә улс болҗ өстн гиҗ эн дурдв.
Сурһульчнр Саңһҗин Босян үүдәлтин хаалһин тускар келәд, шүлгүдинь айслулҗ умшв. Лиҗин Намср эврә багш Александра Эняевала хамдан «Төрскн теегм» ду дуулснь кеермҗтә болв. 10-ч классин сурһульчнр Зуман Аюна болн Давид Хаджимурадов хальмг улсин шүлгч Саңһҗин Босян үүдәлтин төрәр номин-шинҗллтин көдлмш күцәсиг Хаска Бату өөдәнәр үнлв. Татьяна Басанговна болхла экиннь туск тодлврарн хувалцҗ, нертә шүлгч болн олна үүлдәч болсн деерән дөрвн үртә эк, олн ачнр-зеенртә ээҗ болҗ нер һарсинь онц темдглв. Келхд, Саңһҗин Бося нарт-делкән күүкд улсин түрүн чуулһнд орлцсн бәәҗ, олн келн-улсин иньгллт батруллһнд нилчән күргсн төләдән Иньгллтин орденәр чигн ачлгдсмн.
Эн өдр дунд сурһульд ирсн күндтә гиичнр багшнриг болн сурһульчнриг медрлин Өдрлә бас йөрәһәд, хальмг улсин шүлгч Саңһҗин Босян нер өөдәнәр бәрҗ йовхиг дурдв. Эн сара хонгт шүлгчин үүдәврмүдт оньган тусхаҗ, умшлһна хург давултн, гиҗ таңһчин Толһач седвәр татв. Дунд сурһулин һардачин үүл дааҗадг Арслана Юлия гиичнрт сурһулин хорас, нертә шүлгч Саңһҗин Босяд нерәдгдсн һәәхүл үзүлв.
БАТАН Сәәхлә

Видео