Шинрүлгдсн сурһульд болсн йовдл

07-09-2026, 12:27 | Общество, Таңһчин зәңгс, Зіњг

Сарпан района Садовое селәнә Д.А.Маковкинә нертә 2-ч тойгта дунд сурһульд медрлин Өдрт нерәдгдсн керг-үүлдвр байрта-бахмҗта таалд давв. Энд «Баһчуд болн бичкдүд» гидг келн-улсин төсвин болн «Хальмг Таңһчин сурһуль-эрдмин делгрлт» шаңһа көтлврин йовудт бат ясвр кегдв.
Багшнр, сурһульчнр болн эк-эцкнр бат ясврин хөөн шинрүлгдсн герт сурһулин җил эклҗәдг йовдлла йөрәхәр ирсн гиичнриг тосв. Нег үлү 1-ч класст орҗадг күүкд-көвүдт эн өдр уданд тодлгдхмн. Келхд, Сарпан РМО-н һардвр эн җил 1-ч класст орҗадг района 45 сурһульчд дорва болн сурһульднь кергтә эд-тавр белглв. Ке-сәәхн хувцан өмсәд кеерсн бичкдүд шүлгүд умшад, байрин хургт билг-эрдмән үзүлв.
Сарпан района толһач Манҗин Басң, Хальмг Таңһчин һазрин болн өлг-эдин хәрлцәнә министр Дошкатан Мергн, Сарпан района прокурор Бадм-Һәрән Церн сурһульчнриг болн багшнриг медрлин Өдрлә йөрәһәд, шинрүлгдсн бәәрнд сурһулян сәәнәр сурад, спортын болн билг-эрдмин халхар ик күцәмҗ бәрхиг дурдв. Дунд сурһулин һардач Каманҗан Данара Хальмг Таңһчин Толһач Хаска Батуд, таңһчин залврин Ахлач Босхмҗин Гиләнд, тосхлтын бүрдәцин элч Анзор Куркаевд багшнрин болн сурһульчнрин нерн деерәс ханлтан өргҗ, шаңһа көтлврин йовудт өдгә цага сән кец-таал тогтасиг өөдәнәр үнлв.
Эн өдр Садовое селәнә 1-ч тойгта дунд сурһульд ончта йовдл болв. Энд Әрәсән мөшклһнә комитетин кадетск класс секгдв. Әрәсән мөшклһнә комитетин Хальмг Таңһчд үүлддг мөшклһнә заллт, Хальмг Таңһчин сурһуль-эрдмин болн номин министерств эн төр хаһлв.
Эн җил мөшклһнә комитет 15 җилин өөнән темдглҗәнә. Баһ Дөрвдә райод хоорндк мөшклһнә әңгин һардач, юстицин полковник Уруса Очр түрүн кадетск класст орсн күүкд-көвүдиг йөрәһәд, сурһулян сәәнәр сурхиг дурдв. Тер мет эн Сарпан района һардврт болн дунд сурһулин багшнрт эднә седвәр дөңнсн төләднь ханлтан өргв.
БАТАН Сәәхлә

Видео