Хальмг келән дасхин төлә

07-09-2026, 12:31 | Общество, Таңһчин зәңгс, Зіњг

Шидр «Калмыкия» РИА-н барин төвд болсн харһлтд орлцачнр хальмг кел ахр болзгт даслһна төрәр ухан-тоолврарн хувалцв. Хальмг кел дарунь даслһна төсвин седвәрч Мучкан Арслң харһлтыг нүр үгәр секв. Эн эврән зурһан нас күртлән хальмгар сәәнәр келдг бәәсмн. Болв дунд сурһульд орад тенд зуг орсар күүнддг болв.
Өдгә цага баһчуд хальмгар келхәсн эмәнә, талт-мулт келхлә талдан әмтн наад бәрх гиҗ саглна. Энткг орн-нутгт әмтн англь кел мууһар меднә, тиигсн бийнь зуульчнрт кесг тоотыг цәәлһҗ өгнә, гиҗ Арслң келв.
- Төрскн келән мууһар меднәв гиҗ эмәлго, өдгә цагин кесг эв-арһс, ниигмин сүлҗә өргнәр олзлх кергтә, тиигхлә төрскн келән ахр болзгт дасч болҗана. Дмитрий Петровин үүдәсн эв-арһ эн туст бас дөң болҗана. Әрәсән «Сойл» телеүзлд хальмг кел 16 часин эргцд дасч авх эв-арһин туск соңсхвр һарла. Дмитрий Петровла эврән харһад, хальмг кел даслһнд дөң болтн гиҗ сурлав. Эннь номтыг икәр соньмсулв, йирдән хальмг сойл номтын төлә соньн болҗасмн. Ода Дмитрий Петровин эклсн төсвин хойрдгч девсң эклҗәнә. Бөдүн улсин болн бичкдүдин төлә хойр даслур һарһвидн, күүндвр келһнд энд һол оньг өггдҗәнә, кесг эв-дов заагдҗана, цәәлһвр өггдҗәнә. Ода өдгә цага эв-арһс делгрҗәнә, терүнә дөңгәр Хальмг Таңһчд бәәдг күн болһн төрскн келән дасч авх зөвтә»,- гиҗ Мучкан Арслң келв.
Хальмг Таңһчин сойлын болн зуульчллһна министр Бембин Евгений бас эн күүндврт орлцад, эн нәрн төрәр ухан-тоолврарн хувалцв. Олн-әмтнд хальмг кел дасххин төлә төсв тохрагдҗахнь ик байрта йовдл мөн. Медәтә улс чигн эн өдгә цага йосн биш ухана эв-арһс, ниигмин сүлҗә олзлҗ өвкнрин келән дасч чадх. Ода кел даслһна таал оңдарҗана. Электронн толь олзлҗ кергтә үгиг дарунь олҗ авч болҗана. Хальмг кел даслһна җисәг ода баһчуд делгрүлҗәхнь бас ик чинртә керг мөн. Эднә үлгүрәр талдан чигн баһ наста улс төрскн келндән оньган өгч, өдгә цагин эв-арһ олзлҗ дасхла, мана өвкнрин кел улм өргнәр өрк-бүл болһнд, таңһчин, района, селәнә керг-үүлдврт олзлҗ чадхвидн, гиҗ Евгений Владимирович темдглв.
Харһлтд орлцсн Мазна Алексейин келсәр болхла, Мучкан Арслң олна төсвд орлцх үрвр энүнд кесн болдг. Эн хальмг келән меднә, болв сәәнәр дасх санан бәәнә. Эн шин эв-арһ олзлҗ, йирин күүндврт ода орлцна.
- Дмитрий Петровин дамшлт кел даслһнд дөң-нөкд болҗана, олн-әмтн энүг өргнәр олзлҗана. Ода хойр даслурин улд хальмг кел даслһна шин девсң эклх, - гиҗ күүндврт Шурһчин Гилян орлцв. – Эн төсвин түрүн девсңгин йовудт кесг күн хальмг кел дасчала. Келән дасх седклтә күн терүг олзлҗ чадх. Хальмгуд бәәтхә, мана тал ирдг зуульчнр хальмг келәр соньмсна, ямаран хальмг үлгүр бәәдгинь медхәр седнә. Тиим кевәр зуульчнрин болн талдан улсин төлә чигн эн төсвиг цааранднь өргҗүлх кергтә. Шин даслурмуд альд хулдгдхинь хөөннь зәңглхвидн гиҗ Шурһчин Гилян темдглв.
Баһчуд шин эв-арһиг өргнәр олзлҗ хальмг кел дасч чадхнь лавта. «Мана дун» гидг шин эв-арһин тускар кесг тоот олҗ авч болхмн гиҗ күүндврт орлцсн баһчуд заав. Келән дасх дурн бәәхлә альд болв чигн дасхлур эс гиҗ Дмитрий Петровин эв-арһ олзлҗ болхмн.
ҖААХАН Бадм

Видео