Эмчнр дәкәд һурвн районд одв

Сегодня, 13:57 | Общество, Таңһчин зәңгс, Зіњг

Хальмг Таңһчин Толһач Хаска Батун седвәрәр болн «Негдсн Әрәсә» партин таңһчин әңгин «Эрүл-менд иргч» гидг төсвин йовудт бүрдәгдсн «Эрүл-менд бәәтн!» гидг керг-үүлдвр цаарандан давҗана. Давсн долан хонгт эмчнр Сарпан, Көтчнрә болн Хар Һазра райодт одад, селәнә әмтнә эрүл-мендин бәәдл шинҗлв.
Эмчнр хамгин түрүнд медәтнрт, цергә шишлң керг-үүлдврт орлцачнрт болн теднә өрк-бүлмүдин гешүдт дөңгән күргхәр шунна. Тер мет гемин уршгар эмнлһнд күрч чаддго улст эмчнр гертнь одад, эрүл-мендин бәәдлинь шинҗлҗ, эмнлһнә туст селвгән өгнә.
Сарпан района Садовое, Кировский, Аршан-Зелмн, Һооҗур селәдин әмтн эмчнрт бийән үзүлв. Эн өдр эмчнр УЗИ-н, ЭКГ-н, маммографин шинҗллт кев, эрүл-мендин Төвин мергҗлтнр әмтнлә чик авг-бәрцин тускар күүндв. Эмчнрин хәләврт орсн улст олн зүсн гем илдкгдв, тегәд 35 күн немр шинҗллтд орх селвг өггдв. Дәкәд 24 күн эмнлһнә бүрдәцд эрүл-мендин бәәдлән батрулх болҗ шиидгдв.
Һаха сарин 2-т эмчнр Көтчнрә района Шевнр болн Көтчнр селәдт көдлв. Эн өдр ут тоодан 277 күн, тер тоод цергә керг-үүлдврт орлцсн дәәч болн СВО-н орлцачнрин өрк-бүлмүдин 4 гешүн эмчнр тал ирв. Эмчнрин селвгәр 81 күн немр шинҗллт кех болв.
Долан хонгин чилгчәр эмчнр Хар Һазра района Адг болн Комсомольский сәләдин әмтнд дөңгән күргв. Района эмнлһнә эмчнрт Элст балһсна поликлиникин, О.Шунгаеван нертә нилхд төрлһнә төвин болн Лаганя района эмнлһнә мергҗлтнр нөкд болад, селәнә улсин эрүл-мендин бәәдл шинҗлв. Эн долан хонгт эмчнр Баһ Дөрвдә болн Городовиковск райодын әмтнд дөңгән күргхмн. Хөөннь эмчнр Лаганя болн Приютна райодт одхмн, тиигәд «Эрүл-менд бәәтн!» гидг керг-үүлдврин дарани девсң төгсх зөвтә.

БАТАН Сәәхлә
ЗУРГТ: эмчнр Көтчнрә районд көдлв

Видео