Олна үүлдәчин нерн мөңкрүлгдв

Сегодня, 14:02 | Общество, Таңһчин зәңгс, Зіњг

Шидр Элст балһснд олна үүлдәч, таңһчин болн орн-нутгин зака үүдәгч болн йосна бүрдәцст көдлҗ йовсн Хальмг Таңһчин улсин эдл-ахун ачта көдләч Мукөвүнә Максимин санлын самбр секгдв.
Мукөвүнә Максим «Красносельский» эдл-ахуд агрономч болҗ күч-көлснә хаалһан экләд, хөөннь һардачар көдлсмн. Максим Бембеевич таңһчин селәнә эдл-ахун министрин дарук, Хальмг АССР-ин Министрмүдин Хүүвин Ахлач, таңһчин зуран комитетин ахлач болад, таңһчин социальн-экономическ делгрлтд ик ач-тусан күргсмн. Тер мет эн Хальмг АССР-ин болн РСФСР-ин Деед Советин депутатд суңһгдад, зака үүдәгч халхар аһу ик көдлмш кесмн. Мукөвүнә Максим нарт-делкән хәрлцәнә делгрлтд чигн тәвцән орулҗ, Туркменистанд Әрәсән элчллтд көдлсмн. Дааврта көдлмшт, ик үүл дааҗ йовсн бийнь Максим Бембеевич цаһан седклтә, әмтнлә тевчңгү, ик санан уга күн бәәсмн гиҗ эн кергт орлцсн улс темдглв.
Мукөвүнә Максим 2024 җилд насан барсмн, энүнлә хамдан көдлҗ йовсн үүрмүднь, таньл-үзл улс санлынь мөңкрүлх шиидвр авв гиҗ олна үүлдәч Бамбан Владимир келв. Элст балһсна һардвр эднә седвәриг дөңнәд, хотл балһсна нег уульцнд энүнә нер зүүлһх болв. Дарунь Максим Бембеевичиг медҗ йовсн үүрмүднь эврәннь тодлврмудан бичәд, дегтр барлҗ һарһв.
Хальмг Таңһчин Улсин Хуралд (Парламентд) Хальмг Таңһчин Толһачин элч Манҗин Араш Мукөвүнә Максим эдл-ахун һардач болад, Әрәсән Деед Советин депутат болҗ, төрскн һазр-уснаннь делгрлтд ик ач-тусан күргҗ олна санлд мөңкинд үлдв гив. Хальмг Таңһчин Толһач Хаска Бату илгәсн ханлтын үг соңсхад, йоста хальмг залу нутгин төлә зүткдг гиҗ темдглв. Хальмг улсин бичәч Нуура Владимир, Хальмг Таңһчин күндтә иргн Намсинә Геннадий, Максим Бембеевичин элгн-садн Очра Баатыр, Сарпан района Догзмакн селәнд өсәд-боссн нег һазра улс Максим Бембеевичин туск тодлврарн хувалцв. Мукөвүнә Лидия авалиннь санл тодлҗ неринь мөңкрүллһнд орлцсн улст өрк-бүлиннь нерн деерәс ханлтан өргв.
ДООҖАН Наталья

Видео