Нертә артист лекц умшв

Сегодня, 09:16 | Общество, Таңһчин зәңгс, Зіњг

Урҗ өдр мана орн-нутгин Президент Владимир Путинә зәрлгәс иштә түрүн болҗ Әрәсән келн-улсин келнә Өдр темдглгдв. Әрәсәд бәәдг олн келн-улсин кел, сойл, тууҗ хадһлхин болн олн-әмтн хоорндан ниитәһәр бәәхин төлә эн өдр батлгдсн болдг. Улсин ниицлтин җилд эннь темдглгдснь ончта болв.

Байрин өдрлә ирлцҗ, нертә артист, «Медрл» ниицәнә элч Максим Белбородов (зургт) Элстд ирҗ, баһчудт лекц умшв.
Һаха сарин 8-д сән Өдр батлгдснь хара биш, юңгад гихлә мел эн өдрлә Дагестана улсин шүлгч, нертә үүлдәч Расул Гамзатов һарсн болҗана. Олн җилдән Расул Гамзатовичин үүдәврмүднь олн келнд орчулгдад, энүнә тускар Әрәсәд бәәтхә һазадын нутгудт чигн әмтн сәәнәр меднә. Энүнә җирһлин болн үүдәлтин хаалһнь мана орн-нутгин сойлын зөөр мөн.
Тер мет таңһчин сурһуль-эрдмин болн номин министр Ким Александр, «Медрл» ниицәнә хальмг әңгин һардач Манҗин Элеонора болн «Движение первых» җисәнә әңгин ахлач Анхана Саглр керг-үүлдврт бас орлцв.
Ким Александр үг авч, цуглрсн баһчудыг йөрәв. Энүнә келсәр, мана орн-нутгт бәәдг олн келн-улсин элч болһн эврәннь төрскн келән, сойлан, өвкнрин авг-бәрцән эрк биш медх зөвтә болна. Терүнәс нань тер өдр Цугәрәсән диктант хальмг келәр бичгдсинь эн бас темдглв.
Күндтә гиич Хальмгт цаһан седклтә, тевчңгү улс бәәдгиг заав. Тер мет хальмг малын шимтә махар тоогдснь бас өврмҗтә болҗ. Эң-зах уга өргн хальмг тег бахмҗ үүдәсиг темдглв.
Кинод эн олн келн-улсин элчнрин дүрмүд наадсан тодлв. Келн-улс болһн эврә өвәрцтә болдг, теднә сойл-авг-бәрциг өөрхн медәд, мана орн-нутгт кедү келн-улс хоорндан ниитәһәр бәәснд өврнәч, гиҗ М.Белбородов ухан-тоолврарн хувалцв.
Харһлтын йовудт эн кинод наадсн дүрмүдин тускар тодрхаһар келҗ, баһчудын сурврмудт хәрү өгв.
КАРСАНА Евгения

Видео