Хальмг келән дөңнәд

Сегодня, 09:29 | Общество, Таңһчин зәңгс, Зіњг

Әрәсән Президент Владимир Путинә зәрлгәс иштә һаха сарин 8-д Әрәсән улсин келнә Өдр түрүн болҗ темдглгдв. Эн өдр Дагестана улсин шүлгч Расул Гамзатов һарсмн, тегәд энүнә үүдәврмүдин тасрхаг 21 келәр бичв. Эн өдр орн-нутгин регионмудар, тер тоод Хальмг Таңһчд төрскн келәр диктант бичв. Элст балһснд һурвн талвңд эн керг-үүлдвр болв. Б.Б.Городовиковин нертә Хальмг ик сурһульд, Амр-Санана нертә Келн-улсин дегтрин саңд болн баһчудын Герт әмтн эн өдр цуглрв.
Хальмг ик сурһулин хальмг кел шинҗллһнә болн дорд-үзгин күрәлңгин улд болсн керг-үүлдврт нурһлҗ оютнр орлцв. Болв эврә сән дурар эн кергт орлцхар ирсн улс бас хальмг келнә медрлән сөрҗ үзв. Теднә тоод олн җилдән Хар Һазра района Ачнр селәнә дунд сурһульд багшлҗ йовсн Көкән Кермәш билә. Тууҗин багшар болн хөөннь дегтрин саңд көдлҗ йовсн медәт хальмг келән дөңнәд, Әрәсән улсин келнә Өдрт нерәдгдсн керг-үүлдврт орлцхар шиидсн болдг. Келхд, Кермәш Чириловна 2019 җилд Хальмг ик сурһульд болсн диктантд бас орлцсн бәәҗ. Манҗин Нимгрин «Ик герин бичкн эзн» гидг үүдәврәр диктант йилһән сәәнәр бичсн төләдән, Күндллһнә һашгар ачлгдсн билә.
Хальмг кел делгрүллһнә төвин һардачин үүл дааҗадг Мутан Елена болн хальмг кел шинҗллһнә болн дорд-үзгин күрәлңгин һардач Лиҗин Миңгиян сән Өдрлә йөрәһәд, төрскн келән дөңнхәр ирсн улст ханлтан өргв. Әрәсән улсин ниицлтин җилд эн өдр зарлгдснь хойр дам темдгтә болҗахиг эдн темдглв. Эн өдр 100 шаху оютн диктант бичв. Эн керг-үүлдврт орлцач болһнд иткл цаасн бәрүлҗ өггдв.
БАТАН Сәәхлә

Видео