Медәтнрин «Одд»

Сегодня, 14:37 | Общество, Таңһчин зәңгс, Зіњг

Таңһчин әмтнә социальн теткврин төвд медәтнрин төлә олн негдлтс үүлднә. Ах үйин улс эрүл-мендән батруллһна, билг-эрдмин, үүл бәрлһнә, бииһин болн нань чигн негдлтст орлцад, цаган сергмҗтәһәр болн тустаһар давулна.
Нидн төвин улд «Одд» гидг бииһин негдлт секгдв. Терүг Эрднин Елена һардна. Елена Викторовна Чонкуша Петрин нертә билг-эрдмин училищ төгсәснә хөөн «Өөрднр» бииһин театрт биилҗ йовсмн. Сүл җилмүдт эн Элст балһсна 1-ч тойгта көгҗмин сурһульд багшлҗана. Балһсна 18-ч тойгта дунд сурһулин улд үүлддг әңгд эн бииһин кичәл давулҗ, «Миңһн байр» баг һардна. Олн җилдән таңһчин сойлын халхар үүлдәд, билг-эрдмәрн кесг һазрт нер һарсн бииһин театрт көдлснә хөөн Эрднин Елена медәтнрлә көдлҗәхдән байрлна.
- Таңһчин әмтнә социальн теткврин төв тосхгдсна хөөн бииһин хора секгдв. Энд билг-эрдмән делгрүлхин төлә цуг таал бәәнә. Бидн долан хонгт хойр дәкҗ харһад, олн келн-улсин би даснавидн. Дулан цагт Элстин паркд чигн харһад биилнәвидн. Кичәлән эклхәс урд цогц-махмудан тинилһәд, белдвр кенәвидн. Ачта амрлһнд һарсн медәтнр төвин улд үүлддг негдлтст орлцад, хамдан күүндәд, үүл бәрәд, билг-эрдмән делгрүлнә. Эдн чик авг-бәрцин багд орад, йовһар йовна, цогц-махмудан батрулна. Ах үйин улст тиим харһлтс чидл-омг өгч, сергмҗтәһәр амрхд туслна. Бидн ниигмин сүлҗәнд эврә баг бүрдәһәд, кен-негинь һарсн өдрләнь йөрәнәвидн. Зәрм медәтнр һанцарн бәәнә, тегәд олн үр-иньгтә болснь эднд байр үүдәнә, - гиҗ Елена Викторовна келнә.
Бииһин багд цергә шишлң керг-үүлдврт орлцачнрин экнр бәәнә. Һәрән Аннан көвүнь цергә шишлң керг-үүлдврт зәңг-зә угаһар геедрв, үрән геесн экин зовлңгиг хувалцад, багд орлцачнр энүнд дөң-нөкд болна. Бииһин негдлтд ирсн кемд Анна Николаевнад чидл урһсн болҗ медгдв. Эн багшин училищд олн җилдән көдлҗ йовсмн, тегәд бииһин негдлтд орлцачнр дунд энүнә оютнр чигн бәәхнь энүг байрлулв.
Бован Валентина, Айдара Галина, Ариста Валентина, Увшан Валентина, Арнюдан Надежда, Маман Людмила болн нань чигн медәтнр социальн теткврин төвин үүлдврт шунмһаһар орлцна. Эн үвләр «Одд» бииһин негдлт Әрәсән билг-эрдмин марһанд орлцад, дииләчнрин тоод орснь бахмҗта йовдл болв. Ода эдн Элст балһсна Өдрт нерәдгдсн байрт орлцхар белдҗәнә. Приютна района социальн теткврин төвлә бат залһлда бәрҗ, нег-негндән гиичлҗ одна, хамцу концертс чигн давулна.
Елена Викторовна бийнь бичкнәсн авн биилдг бәәсмн хотл балһсна 2-ч тойгта дунд сурһульд күүкн бииһин негдлтд ордг билә. Данзн авальтаһан эн «Өөрднр» бииһин театрт таньлдсмн, хамдан һазадын кесг орн-нутгт одад, билг-эрдмин наадмд орлцсмн. Һурвн үрнь бичкнәсн авн эк-эцкиннь үлгүрәр билгтә улс болҗ өсв.
БАТАН Сәәхлә
ЗУРГТ: Эрднин Елена «Одд» гидг бииһин негдлтин медәтнрлә Элстин паркд

Видео