Дәәчнриг дөңнх закад батлгдв

13-10-2026, 11:49 | Общество, Таңһчин зәңгс, Зіњг

Шидр Хальмг Таңһчин Улсин Хуралын (Парламентин) сессь болв. Таңһчин Улсин Хуралын Ахлач Артем Михайлов сессиг һардҗ давулад, депутат Михаил Богатовиг Әрәсән Орн-нутгин Хүүвин депутатд суңһгдснла йөрәв. Депутатнр ут тоодан хөрн дөрвн төр хәләһәд, таңһчин закадт сольвр орулад, цергә шишлң керг-үүлдврт орлцачнрин, гемтә-шалтгта улсин социальн теткврин, һазрин чинрин туск болн нань чигн төрмүд хаһлв. Тер мет депутатнр орн-нутгин закадын төсвсиг бас дөңнв.
Хургин йовудт депутатнр таңһчд күүнә болн бичкдүдин зөв харслһна күцц зөвтә элчнриг батлв. Урднь эн үүл дааҗ йовсн Валерий Чуб болн Чужан Наталья дарук тавн җилин эргцд цааранднь көдлх болҗ һарв, Артем Михайлов көдлмштнь күцәмҗ дурдҗ йөрәв. Бачан Саглр болн Коткан Чиңһс Яшалтан района болн Элстин 5-ч тойгта зарһин әңгүдин ниицлтин зарһчнрин үүлд цаг-болзг уга кемд батлгдв.
Эн сессьт цергә шишлң керг-үүлдврт орлцачнриг дөңнлһнә закадын төсвс хәләгдв. Тиигәд, Хальмг Таңһчин прокурор Виталий Семенченко цергә үүлдврин ветеранмудын төлә көдлмшч ормс батллһна, таңһчин социальн делгрлтин, күч-көлснә болн көдлмшәр тетклһнә министр Нахошкинә Мингиян цергә шишлң керг-үүлдврт орлцачнрин болн эднә өрк-бүлмүдин социальн теткврин, дәәчнриг муниципальн цергллтин көдлмшт орсна цагт эдниг дөңнлһнә туск закадын төсвсин седвәр татв. Депутатнр энүг нег дууһарн дөңнәд, закадыг батлв.
Хальмг Таңһчин эрүл-менд харлһна министрин үүл дааҗадг Мушаран Арслң 2030 җил күртл мана таңһчд түрүн дөң күрглһнә бүрдәцсин үүлдвриг шинрүллһнә көтлврин йовудт күцәгдҗәдг керг-үүлдврмүдин тускар тодрхаһар цәәлһәд, эмнлһнә бүрдәцст кегдҗәдг бат ясврин, шишлң кергсл хулдҗ авлһна, шин ФАП-муд тосхлһна тускар зәңглв. Сүл җилмүдт таңһчин эрүл-менд харлһна халх делгрҗәнә, болв тер бийнь мергҗлтнрәрин, эмнлһнә бүрдәцсин үүлдврин төр нәрн болҗана гиҗ депутатнр зааһад, эрүл-менд харлһна төрәр салу сүүр давулхар шиидв.
Тер мет Әрәсән күч-көлснә болн социальн харслтын министр А.Котяковин нернд дуудвр илгәхин туск седвәр татв. 2024-2025 җилмүдин ашар мана таңһчд нилхд төрлһнә кемҗән баһрсн болв. Тегәд «Өрк-бүл» гидг келн-улсин төсвин «Олн үртә өрк-бүл» гидг көтлврин йовудт шаңһа хазнас мөңг авч болхмн гиҗ депутат Эрднин Гилән цәәлһснә хөөн депутатнр орн-нутгин министрин хайгар дуудвр илгәхин туст тогтавр батлв.
Эн сессьт һазрин төрәр хойр закана төсв хәләгдв. Тиигәд, Целинн районд хог-бог эд-бод кедг бүрдәц күртл хаалһ тосхлһна төлә селәнә эдл-ахун һазрин чинр сольх кергтә болв. Тер мет сад-һаруд бәрдг улст йилһдг һазрин туст таңһчин заканд сольвр орулгдв. Таңһчин экономикин болн хулд-гүүлгәнә министр Чиджин Андрей таңһчд йосна келнә туск заканд сольвр оруллһна тускар келв. Тиигәд, ода эд-таврин туск зәңг орс болн хальмг келәр бичгдх зөвтә мөн.
Хальмг Таңһчин Улсин Хуралын (Парламентин) Ахлач Артем Михайлов сессин көдлмш ашлад, зуралгдсн төрмүдәр өргн күүндвр болв гиҗ темдглв. Цергә шишлң керг-үүлдврт орлцачнриг дөңнлһнә төрмүд депутатнрин һол оньгт бәәнә, тегәд таңһчин закадт орулгдсн сольврмуд эднә зөв харслһнд туслхнь маһд уга.

ДООҖАН Наталья

Видео