Олна дунд ик ачта эмч

Сегодня, 12:56 | Общество, Таңһчин зәңгс, Зіњг

Эн өдрмүдт Әрәсән эрүл-менд харлһна йилһән сән көдләч, байн дамшлтта болн өөдән мергҗлттә нейрохирург Алексей Ермолаев 70 насна өөнән темдглҗәнә. Казахстанд һарсн Алексей Михайлович Әәдрхнд ик сурһуль төгсәснә хөөн 1979 җилд Хальмг Таңһчд күч-көлснә хаалһан экләд, тәвн шаху җилдән энд көдлҗ йовна. Эн җилмүдин эргцд эн кедү күүнә әм аврҗ, баһ наста эмчнрт дөң-нөкд болҗ, ик ач-тусан күргсн болх гинәт.
Ермолаевихнә өрк-бүл Гурьев балһснд бәәсмн. Эк-эцкнь Михаил Павлович болн Татьяна Анатольевна Сергей болн Алексей көвүдтән чик сурһмҗ өгхәр шунсмн. Эднә герт эмч нег күүкд күн билә, тегәд ик-бичкн уга терүг күндлҗ тевчдг бәәсмн. Әмтнлә ээлтә, дигтә-тагта, цугтаднь дөң-тусан күргхәр адһдг күүкд күн эмч күүнә сән үлгүр болҗ, олн дунд бахмҗ үүдәҗ йовсмн. Терүнә үлгүрәр Алексей бичкнәсн авн эмч болхар шиидв.
- Ик сурһулян төгсәснә хөөн Элстүр ирәд, таңһчин эмнлһнә реанимацин әңгд күч-көлснә хаалһан эклләв. Дамшлтта эмчнр Галина Беляева болн Михаил Мещеряков нанд сүв-селвгән өгәд, цугинь зааҗ нөкд болсмн. Хөөннь таңһчин бичкдүдин эмнлһнд шин әңг секгдхлә, би тиигәрән һарлав. Эмч Тачин Санлын һардврт көл-һаран авсн бичкдүдт дөң күрглһнә халхар байн дамшлт хоршалав. Таңһчин эмнлһнд нейрохирургическ әңг экләд үүлдхлә, Шарту болн Москва балһсна нүүрлгч төвмүдт мергҗлтән өөдлүләд, энд олн җилдән көдлләв. Эн әңгиг бүрдәсн болн олн җилдән һардсн Владимир Антоновла болн Дальдинә Сергейлә хамдан өөдән чинртә месллһ кеҗ, күнд гемтә улст нөкд болвидн. Ода би таңһчин эмнлһнә поликлиникд көдлҗәнәв, - гиҗ Алексей Михайлович күүндврин йовудт цәәлһв.
1988 җилд нейрохирургическ әңг секгдсн цагт сән һара керсгл чигн уга бәәсмн, тегәд Владимир Антонов, Дальдинә Сергей болн Алексей Ермолаев нейрохирургическ цергллтин делгрлтд ик ач-тусан күргсн эмчнр болна. Келхд, Алексей Михайлович месллһ келһнд микроскоп олзлсн түрүн эмч мөн. Эндр баһ наста эмчнр эднә кергиг күцәмҗтәһәр делгрүлҗ, өөдән чинртә месллһ кеҗәхнь ах үүрмүдтнь бахмҗта болна.
Хөрн һар җил хооран эн әңгд күч-көлснә хаалһан экләд, эндр терүг һардҗадг эмч Бамбан Саврин төлә Алексей Михайлович багшнь болҗ тоолгдна. «Бидн хамдан нег әңгд ниитәһәр көдлвидн. Алексей Михайлович мини төлҗлтд ик нилчән күргсн күн болна, тегәд ах үүртән ик ханлтта бәәнәв. Йирин эн цаһан седклтә, үүрсг, әмтнлә ээлтә, сән заңта болн чик авг-бәрцтә, керсү күн болна, көдлмшин болн җирһлин халхар өгсн сүв-селвгинь оньгтан авнав. Мана әңгин көдләчнрин нерн деерәс Алексей Михайловичиг ончта өөнләнь йөрәҗәнәв, хөв-кишг болн бат эрүл-менд дурдҗанав», - гиҗ Савр Александрович келнә.
Алексей Ермолаев тәвн шаху җил хооран мана таңһчур ирәд, хальмг теегт хөвән олв. Дөчн долан җилин эргцд таңһчин эрүл-менд харлһна делгрлтд ач-тусан күргәд, дамшлтта болн ачта эмч болад, хамдан көдлҗәдг үүрмүдтән үлгүр-үзмҗ болҗ йовна. Герин чимг болсн итклтә үр-иньг Светлана Тихоновнала хамдан эдн сад-һарудтан олн зүсн цецгүд, зер-земш урһаҗ, Артем Данир хойр ачан альхн деерән бәрҗ өскчәнә. Урднь сул цаг учрхла, Алексей Михайлович заһс бәрхдән болн аңһучлхдан дурта билә. Олн җилин туршарт эн бассейнд өөмәд, цогц-махмудан батрулна. Эмчин тоолврар күн болһн цогц-махмудан батрулхла ут нас наслҗ чадх. Дәкәд керүл-цүүгән уга бәәх, цаһан седклтә болҗ, әмтнд сә кеҗ, мууһинь дарад, сәәнинь өргәд, бәәсәрн бәәх кергтә гиҗ эн тоолна. Секдл төвкнүн бәәхлә, зүркн байрар дүүрч, ямр наста болснь төрүц медгдхш гиҗ Алексей Михайлович келдгнь чигн мел үнн.

ДООҖАН Наталья
ЗУРГТ: Әрәсән эрүл-менд харлһна йилһән сән көдләч Алексей Ермолаев (сууна) нейрохирургическ әңгин һардач Бамбан Савр хойр
Түүрвәчин цоксн зург

Видео