«Салдсин эцк» медаляр ачлгдв

22-10-2026, 12:22 | Общество, Таңһчин зәңгс, Зіњг

Эцкин өдр. Иим нертә сән өдр мана литд 2021 җилд орсмн. Эн җилин хулһн сарин 16-д Н. Пальмовин нертә Келн-улсин музейд эцкнрин Өдриг угтсн байрин хург болв. Хальмг Таңһчин Улсин Хуралын (Парламентин) Ахлач Артем Михайлов, таңһчин социальн делгрлтин, күч-көлснә болн көдлмшәр тетклһнә министр Нахошкинә Мингиян, таңһчин сойлын болн зуульчллһна министр Бембин Евгений, Хальмг Таңһчин залврин Ахлачин ах селвгч Манҗин Пүрвә болн нань чигн улс эн байрт орлцв.
Төрскән харсгч Алдр дәәнә җилмүдт диилвр делдсн хальмгудын тускар соньн һәәхүл бүрдәгдсмн. Дән эклсн күнд цагт Хальмгин көгшд, күүкд улс, баһ наста күүкд-көвүд Әәдрхн Кизләр хоорндк тосхсн төмр хаалһ фронтыг цуг кергтә тоотар тетклһнд ик чинр зүүсмн. Дәәнә тууҗин дәкн нег халхнь – Тең һол деер болсн күчтә дәәлдәнд 110-ч Хальмг мөрн цергә онц дивизь хортна дәврлһиг зогсасн зөргтә йовдлд нерәдгднә. Эн дәәлдәнә һалд Хальмгин түрүн Баатр Делгә Эрднь зөргәрн туурсн болдг. Тәрүнә дару Хулхтын эргнд болсн, дарунь Элст балһсиг сулдхлһна дәәлдәнә тускар келгдв. Эн дәәлдәнд ончрсн 28-ч Әәрмин ханьд «Хальмг үннә» ветеранмуд Җамбин Ярославин, Җимбин Андрейин, Бакан Бембетин нерд тодллгдсмн.
«Салдсин эцк» гидг медалиг бәрүлҗ өглһнә байрин эклцәр Хальмг Таңһчин Улсин Хуралын (Парламентин) Ахлач Артем Михайлов йөрәлин үг келв.
Эцк гисн үгин чинр йир ик. Көвүднь күн болад, Төрскән харсхла, эцкин даавр нег үлү ик болна. Тегәд чигн «Салдсин эцк» гидг медалин чинрнь ик, энтн олна күндллһнә, Төрскән харсачнриг өсксн эцкнрин ачинь медүллһнә темдг болҗана. «Салдсин эцк» медалиг Җаңһр Климентьевич Адьяновд бәрүлҗ өгв. Җаңһр Климентьевич олна җирһлд шунҗ орлцад, олна дунд күндллһ олсмн. Байн Манжиевна авальтаһан хамдан эдн бат өрк-бүл тогтаһад, хойр үрән өскәд, ода дөрвн ач-зееһән хәләҗәнә.
Эднә көвүнь Климентий Джангарович офицер болад, цергә шишлң керг-үүлдврт орлцҗ йовна. Зөргтә хальмг дәәч өөдән ачлврмудар темдглгдсмн.
Климентийин эцкнь «Салдсин эцк» гидг медаляр, экнь болхла Хальмгин Олна палатын Күндллһнә һашгар ачлгдв.
«Салдсин эцк» гидг медалиг эцк Хаиржан Файдуллаевич Испусиновд Министр Нахошкинә Мингиян зүүлһв.
Хаиржан Файдуллаевич дөрвн үрән өскәд, селәнә эдл-ахун халхар һучн һар җилдән көдлҗ йовна. Көдлмшән үнн-чик седклтәһәр күцәҗ йовсн төләдән таңһчин селәнә эдл-ахун министерствин Ханлтын бичгәр болн Күндллһнә һашгар ачлгдсмн. Ууһн көвүнь Бигжан Хаиржанович Чечняд болсн дәәллдәнд орлцад, ода цергә шишлң керг-үүлдвр болҗадг һазрт дәәлдҗ йовна. Цергә даалһвран зөргтәһәр күцәсндән Бигжан «Залу-зөргин төлә», «Цергә ончрлтын төлә» болн «Курск мүҗин харсач» медальмүдәр ачлгдсмн. Бигжана экднь Хальмг Таңһчин Олна палатын Күндллһнә һашг бәрүлҗ өггдв.
Кузибай Эргашев Советск әәрмд церглснәннь хөөн геологическ багд көдлҗ йовсмн. «Салдсин эцк» медалиг энүнд министр Бембин Евгений бәрүлв. Кузибай Руслановичин көвүн Эдуард цергә үүлдвртән ончрад, офицерин нер зүүҗ Чеченск Республикд болсн дәәлдәнд орлцсмн. 2022 җилин мөчн сард цергә шишлң керг-үүлдврин йовудт даалһвран күцәҗ йовад, Эдуард әмнәсн хаһцсмн. Зөргтә көвүнә экднь Людмила Басанговад бас Олна палатын Күндллһнә һашг бәрүлҗ өггдв.
Олна күндллһнә темдг болгч медалиг Эрднин Владимирт таңһчин залврин Ахлачин ах селвгч Манҗин Пүрвә зүүлһв.
Владимир Анатольевич Улан Эргд малчар, 2025 җиләс авн «Хар һазр» заповедникд көдлсмн. Көвүнь ах лейтенант Эрднин Михаил кесг дәәлдәнд орлцад, «Залу-зөргин төлә» болн нань чигн медаляр ачлгдсмн. «Кавказд церглснә төлә» гидг темдг хальмг офицерин зөргтә үүлдвриг медүлҗәнә. Зөргтә хальмг офицерин эк Наталия Валерьевнад Олна Палатын Күндллһнә һашг бәрүлҗ өггдснь бас темдгтә болв.
Хальмг Таңһчин Олна палатын ахлач, «Әрәсән эцкнр» гидг Цугәрәсән олна бүрдәцин хальмг әңгин һардач Мучан Баатрин келсәр, эцкин Өдриг цуг орн-нутгт темдглнә. Төрскнч седклтә, зөргтә үрдиг өсксн күндтә эцкнрт медальмүд бәрүлҗ өгснь чинртә йовдл мөн. Хальмг Таңһчас тәвн күн ода «Салдсин эцк» медаляр ачлгдсмн. «Хальмгудын хәәһәчнрин ниицән» гидг бүрдәцин һардач Халхин Дмитрий эцкнриг болн экнриг эн байрла йөрәв. Олна эн үүлдәчин келсәр, экин болн эцкин Өдрмүдиг темдгллһн энтн өрк-бүлин чинриг өргҗәдг йовдл болҗана.
Олна палатын ахлач Мучан Баатр эн керг-үүлдвриг бүрдәсн Келн-улсин музейд болн нань чигн бүрдәцст ханлтан өргв. Байрин керг-үүлдвриг Келн-улсин музейин һардачин дарук Ирина Новомлинова һардҗ давулв.

ХӨӨЧИН Галина

Видео