Шаҗна эклц медрл

22-10-2026, 12:30 | Общество, Таңһчин зәңгс, Зіњг

Шаҗна медрл авдг сурһуль Элстд үүлднә. Сурһулин шин җил эклснә дару ирлцңгү сурһуль чигн көдлмшән цааранднь давулв.
Балһсна сурһуль болһнас күүкд-көвүд ирҗ, оюни туст эклц медрл авна. Төрскн һазрин тууҗ - сойл медхәр, өвкнрин авъясмудла таньлдҗ, бурхн-шаҗна эклц медрл авхар баһчуд нааран ирнә.
Сурһулин эн җилд шаҗна туск медрл авхар 34 сурһульч ирсн болв. Хальмг кел делгрүллһнә Төвин һардврт сурһулин көтлвр күцәгдҗәнә. Сурһулин һурвн халхар энд медрл заагдна: «Бурхн-шаҗна гүн ном» гидг халхар цуг сурһульчнрт медрл заагдна. Эн кичәлмүдт бурхн-шаҗна номин эклц медрлә сурһульчнриг таньлдулна. Шаҗна гүн номин медрлиг Хальмгин Шаҗн Лам гевш Тензин Чойдак заана. «Келн-улсин бичлт. Тод бичг» гидг халхар медрл авчадг күүкд-көвүд мана өвкнрин бичлтин тууҗла таньлдҗ, тод үзгәр бичдгиг дасна. Хальмг келнә болн утх-зокъялын багш А. Аджаева сурһульчнрт ирлцңгү медрл дасхна. «Төрскн һазрин тууҗ» гидг халхар болдг кичәлмүдт күүкд Хальмгин тууҗиг гүүнәр шинҗлҗ зуульчлсн болна. Таңһчд учрсн соньн йовдлмудла таньлдулад сойлын зөөр болҗадг хальмгудын авъясмудиг сурһульчнрт медүлнә. Тууҗин багш С. Намысован һардврт эн кичәлмүд давна.
Шаҗна медрл заадг сурһульд кичәлмүд долан хонгин пүрвә өдрмүдлә 16 часас авн 18 час күртл Кичгә Төлән нертә Хальмг келн-улсин гимназин улд болна.
ҖИРҺЛИН Кермн

Видео