Седвәртә волонтермудыг ачлв

Сегодня, 14:01 | Общество, Таңһчин зәңгс, Зіњг

Давсн долан хонгин чилгчәр Санҗин Николайин нер зүүҗәдг сойлын Төвд сән дурар үүлддг медәтнрин хург болв. Эн хург һурвн җил дарандан бүрдәгдҗ, баһчудт төрскнч сурһмҗ өглһнә, цергә шишлң керг-үүлдврт орлцачнриг дөңнлһнә болн олна бәәдл-җирһлд шунмһаһар орлцдг ах үйин седвәртә,улсиг цуглулна. Таңһчин район болһна элчнр эн хургт орлцад, кеҗ-күцәдг көдлмшиннь тускар келҗ өгәд иргч зураһан батлна.
Мана таңһчин ах үйин улс талдан регионмудын волонтермудла бат залһлда бәрҗ хамцу төсвс күцәдгнь эднә шунлтта үүлдврин йовудыг герчлнә. Тиигәд Москва, Аһш, Анапа, Севастополь, Тюмень балһсдын, Удмуртин, Брянск мүҗин, Карелин, Саха-Якутин эврә сән дурар үүлддг медәтнр ниигмин сүлҗәнә эв-арһар хургт орлцачнрт халун мендән илгәҗ, Хальмг Таңһчин волонтермудт күцәмҗ дурдв. Эдн олн зүсн керг-үүлдврмүдт хамдан орлцсан тодлад, седвәртә, өр-өвч седклтә, билгтә ах үйин улсин иньгллт улм батрад йовтха гиҗ дурдв.
Хальмг Таңһчин социальн делгрлтин, күч-көлснә болн көдлмшәр тетклһнә министр Нахошкинә Мингиян хургт орлцачнриг йөрәһәд, эднә үүлдвр дорас өсч йовдг баһчудт үлгүр-үзмҗ болдгиг темдглв. Эндр мана таңһчд 858 күн эврә сән дурар үүлддг улсин тоод орна, теднәснь 321 медәт болна. Эдн әмтнә социальн теткврин төвмүдин улд үүлдҗ, хамдан цаган сергмҗтәһәр болн тустаһар давулна. Таңһчин болн орн-нутгин керг-үүлдврмүдт шунмһаһар орлцдг волонтермуд таңһчин социальн делгрлтин министерствин Ханлтын бичгүдәр ачлгдв.
Хургт орлцсн гиичнр дунд #Биднхамдан нарт-делкән мөрә авсн болн «Седкләрн баахн» гидг орн-нутгин көтлврин элч, «Старость в радость» буйнч седклин саңгин зүүцүләч Ольга Золотарева билә. Эн эврә сән дурар үүлддг улсин Аһш балһсна ниицәнә көдлмшин, талдан регионмудла делгрүлҗәдг нөкцлтин тускар тодрхаһар цәәлһв. 2024 җиләс авн мана таңһчин волонтермудла иньгллтин залһлда батрулҗ, хамдан кесг төсвс күцәсән гиич темдглв. Хам-хоша бәәдг хойр региона медәтнр нег-негндән золһҗ, Әрәсән Өмн үзгин болн Ар Кавказин волонтермудын олна бүрдәцслә бас нөкцҗ үүлдәд, олн керг бүтәсмн. Регионмуд хоорндк залһлдаг делгрүлҗ, дамшлтарн хувалцҗ үүрлх кергтә гиҗ гиич дуудвр кев.
Мана таңһчд иим медәтнрин җисәг һарддг Бургун Инна одахн Москва балһснд «Седкләрн баахн» гидг ниицәнә хургт орлцсна тускар келәд, терүнд босхгдсн төрмүдин тускар зәңглв. Регионмудын хоорндк залһлда делгрүллһнә тускар тер хургт бас келгдсн билә гив. Нидн Хальмг нертә шүлгч Көглтин Давад нерәдгдсн төсв күцәлһнд 18 региона элчнр орлцсна тускар Инна Анатольевна тодлад, эн керг олн- әмтиг хамцулв гиҗ бахтв. Ирх җилд көдлмшән улм ясрулад, шин төсвс күцәхәр зуралҗахан бас келв. Энүнә тоолврар, һанцарн бәәдг медәтнрт онц килмҗән тусхаҗ, эднд нөкд болх кергтә. Тер мет таңһчд үүлддг олна бүрдәцслә нөкцлтән батрулҗ, медәтнр ут нас наслҗ, олна җирһлд шунмһаһар орлцлһна кергиг урмдулхиг темдглв. Седвәртә, олна нүүрт йовдг медәтнрин зуульчллһна хург давулх кергтә, гисн седвәринь цуглрсн улс тосв.
Райодт үүлддг волонтермудын әңгүд эврәннь көдлмшин тускар бас келҗ өгв. Тиигәд, Хар Һазра района Адг селәнд үүлддг «ХамданZA» , Городовиковск района «Паучки», Яшалтан района волонтермуд цергә шишлң керг-үүлдврт орлцачнриг дөңнлһнә кергүд күцәлһнә, баһчудт төрскнч сурһмҗ өглһнә, олн келн-улсин хоорндк ниицлт батруллһна кергүдт туслдгин тускарбас келгдв. Хургин йовудт олна бәәдл-җирһлд шунмһаһар орлцдг волонтермудт ачлврмуд бәрүлҗ өггдв. Харһлтын чилгчәр байрин концерт болв.

ДООҖАН Наталья

Видео