Олна үүлдәчин ачинь темдгләд

Сегодня, 14:04 | Общество, Таңһчин зәңгс, Зіњг

Хулһн сарин 30-д мана орн-нутгт политическ цааҗла харһсн улсин санлыг күндллһнә Өдр болна. Хальмг Таңһчин хотл Элстд болсн санлын керг-үүлдвр тер өдрин учр-утхла ирлцв. Балһсна Илишкинә нертә уульнцд бәәдг герин эрст Хальмг АССР-ин йосна болн олна үүлдәч Җимбин Апушин санлын самбр секгдв.
Ончта эн йовдлыг темдгләд, Хальмг Таңһчин Толһач Хаска Бату илгәсн йөрәлин бичгиг таңһчин Толһачин һардврин ахлач Кирилл Попов цуглрсн улст соңсхв. Санлын самбр секлһнд орлцсн улс Җимбин Апуш таңһчин җирһлд шунҗ үүлдсинь тодлҗ келв. Хальмгин автономь шинәс тогталһна седвәрч багин ханьд 1954-1956 җилмүдт Хальмгин партин бүрдәцин бүрдәмҗин бюрон болн Сарпулин крайин ханьд орҗасн Хальмгин автономн мүҗин бүрдәмҗин әңгин гешүн болҗ, 1956 –1957 җилмүдт Апуш Мутлович бүрдәмҗин көдлмш кеҗ йовснь темдгтә.
Сиврин тууврас хәрҗ ирсн цагас авн 1957 – 1963 җилмүдт Җимбин Апуш Элст балһсна күцәгч әңгин түрүн ахлачнь болҗ көдлҗ йовла. Тер ик дааврта цагт Апуш Мутлович кеҗ йовсн көдлмшин тускар Хальмг Таңһчин Улсин Хуралын (Парламентин) Ахлачин дарук Нуура Николай, Хальмгин Олна Палатын гешүн Балтыра Александр, Хальмг Таңһчин Толһачин селвгч Корнян Геннадий болн нань чигн улс келв.
Җимбин Бем Апуш хойр үйнр болдмн. Эн ах-дү хойр хальмгудыг Сиврин тууврас төрскн теегүрнь нүүлһнд, автономь тогталһнд шунмһа кевәр орлцсмн. Санлын керг-үүлдврт орлцсн әмтнә тодлврмудт Апуш Мутловичин үй дү бәәсн, хамдан йосна болн олна көдлмш күцәҗ йовсн Җимбин Бемин тускар чигн бас келгдв.
Аавднь Җимбин Апушд нерәдсн самбриг җичнь Җимбин Артем секв. Хальмгт автономь тогталһнд орлцҗ йовсн олна үүлдәчнриг мартлго, теднә ач-тусинь темдглҗәдг төләднь Таңһчин Толһачд элгн-саднаннь нерн деерәс Җимбин Константин ханлтан медүлв.
ХӨӨЧИН Галина

Видео