Көтчнрт Очра Номтын санл мөңкрүлв.

Сегодня, 14:09 | Общество, Таңһчин зәңгс, Зіњг


Эн җил мана таңһчд хальмг улсин тууҗд зөвтә орман эзлсн олна үүлдәч, гегәрүлгч Очра Номтын 140 җилин өөн өргмҗтәһәр темдглв. Давсн долан хонгин чилгчәр болхла көтчнрәхн нег һазра нертә номтын санлынь мөңкрүлҗ, урһа моддын һәәхмҗтә бәәрнд бумблвинь секлһнд нерәдсн ончта керг-үүлдвр давулв. Көтчнрә района толһач Азота Санл нүр үг келҗ, Очра Номтын ач-тусинь бас нег темдглҗ өөдәнәр үнлв. Санлын эн йовдлд ирҗ орлцсн Хальмг Таңһчин Толһачин һардврин ахлач Кирилл Попов, таңһчин ачта улсин Хүүвин ахлач Пашнана Эрднь, Хальмг Таңһчин Улсин Хуралын(Парламентин) Ахлачин дарук Нуура Николай, таңһчин сойлын болн зуульчллһна министр Бембин Евгений ахта келсн үгдән хальмг улсин сә хәәлһнә төлә арһ-чидлән нөөлго шунсн Очра Номтын үүлдвриг онц темдгләд, нег һазра улснь номтын санл күндлҗ , ирлцңгү седвәр татсиг дөңнәд, эн буйнч керг нег үлү дорас өсч йовдг баһчудт төрскнч сурһмҗ өглһнә халхар олзта-туста болҗахиг заав. Таңһчин залврин Ахлачин дарук-тооллһна делгрлтин министр Этән Алексей, министр Һооҗура Санл , Улсин Хуралын(Парламентин) депутатнр Кокан Михаил болн Мацга Татьяна, хам-хоша бәәдг райодын толһачнр, Очра Номтын элгн-саднь болн нег һазра улснь Хальмгин хәәртә үрнә санл тевчхәр бас эн кергт орлцв.
Нарт-делкән сойлд ик ач-тусан күргсн Очра Номт «Өөрдин зәңгс» гидг хальмг улсин түрүн газет барас һарһад, давсн зун җилин хөрдгч җилмүдт хальмг бичлтиг шинәс бүрдәһәд, тод бичгәр түрүн үзглл үүдәҗ һарһсн болдг. Нертә номт В. Л. Котвичин билгтә сурһульч болад чигн ик сурһульд сурчасн цагас авн нүүдл хальмг улсин амн үгин зөөрин үүдәврмүд бичҗ авсн мөн. Очра Номтд җаңһрч Ээлән Овла «Җаңһр»алдр дуулврин арвн бөлг хәәлҗ өгсн мөн. Эннь үнтә зөөр болсн деерән өдгә цагт «Җаңһриг» даслһна һол ул-сүүрнь болҗана гиҗ номтнр тоолҗана. Хальмг улсин алдр дуулвр ода нарт-делкән билг-эрдмин чинртә гисн үүдәвр болҗахнь басл хара биш йовдл гихмн. Эндр үүлдҗәдг шинҗләчнрин тоолврар, «Җаңһрт» хальмг улсин хөвтә-кишгтә җирһлин туск седклин санань чигн бас тодрхалулгдснь лавтаһар медгдҗәнә. Эврә улстан итклтә Очра Номтын җирһлнь чигн амр болсн уга, муудан орад, түрәд-зовх чигн саам учрсн болдг. Цааҗла харһад, бәрәнд авгдад, бәәдл-җирһлдән эн дала му үзв. Тиигсн бийнь эн хальмгудын, олна чигн сә хәәлһнә туст кеҗ-күцәсиг нам үнлҗ болшго гиҗ сангдна. Ах үйин әмтнә тодлврар, Очра Номт гүн сурһульта, цецн ухата, сән седклтә күн бәәсмн.
Тегәд чигн минь бәәрн медәтнрин седвәрәр нег һазра алдр номтын ончта өөнлә ирлцүлҗ, төрскн һазртнь, Көтчнрт, урһа моддын шишлң бәәр экләд тосхсн болдг. Келхд, эн һәәхмҗтә орм Очра Номтын нер зүүҗәдг уульнцд секх шиидвр авгдснь чигн басл орта болв. Темдглхәс, эн уульнцд эндр күртл хадһлгдсн нег герт Очра Номт урднь бәәсн болна. Урһа моддын заагт алдр номт-олна үүлдәчин бумбнь дүңгәлһҗ босхгдснь чигн ке болв. Әмтн йовдг хаалһсиг ясад, панрмуд углҗ тәвәд, сууһад амрдг сандлмуд тосхсна ашт Көтчнрт ода энд-тендәс олар ирҗәдг зуульчнриг соньмсулх бас нег өврмҗтә бәәрн секгдснь һәәхмҗтә болв.
Көтчнрәхн басл ниитә, кергтә болхла хамцад ик керг бүтәдг улс болҗахан дәкнәс иткүлв гиҗ ирсн гиичнр келснь чигн соңсгдв. Мел тиигҗ эдн эврә хурлан босхсн билә, ода «Цаанид Чөөрә хурл» района төв селәг кеерүлҗ, иигәрән ирҗәдг кен-негнднь бахмҗ үүдәнә. Очра Номтын нер мөңкрүлҗ, урһа моддын шишлң бәәр тосхлһна әрүн кергиг Хальмг Таңһчин ачта улсин Хүүвин гешүн Шарапа Геннадий һардв, района медәтнр, бәәрн нүүрләчнр болхла бүрдәмҗин багин ханьд орв. Эн җилин ноха сард эклсн буйнч керг-үүлдврт района күч-көлсч коллективс, фермермүд, арһлачнр болн нань чигн өр-өвч седклтә улс демән күргсинь бас үнлх кергтә. Нег үлү Элстд болсн концертд таңһчин нертә артистнр болн бәәрн билгтнр орлцсна ашт ут тоодан зурһан зун миңһн арслң цуглрснь бас олна кергт туслснь маһд уга гих кергтә. Тегәд санлын керг-үүлдврт үг келсн ветеранмуд Шарапа Геннадий, Һәрән Сергей болн Басңга Кермн дөң-нөкд болсн әмтнд ханлтан өргҗ, хальмг улстан үнн-чик кевәр церглҗ, баатр йовдлмуд һарһсн хәәртә үрнә санл тевчҗ күндлсинь онц темдглсн болдг.
Тиигәд урднь эҗго һазрт төрскнч седклтә, шунмһа улсин орлцлһтаһар хойрхн сара хонгин туршт Очра Номтын санлын шишлң бәәрн тосхгдсна тускар келхләрн, кен-негнь йосндан бахтҗ чадхмн гисн ухан чигн орв…

Шагҗин Любовь

Видео