Әмтнд дөңгән күргхәр

Сегодня, 14:16 | Общество, Таңһчин зәңгс, Зіњг

«Справедливая Россия» партин һардвр иргнмүдин эрлһиг күцәдг Цугәрәсән өдриг хулһн сарин 29-д кех шидвриг батлв. Тиигҗ эдн партин 20 җилин өөниг темдглв. Эн өдр Элстд эн партин төвд балһсна әмтн ирҗ, тедниг үүмүлҗәдг кесг төрән медүлҗ, кергтә цәәлһвр авв.
«Справедливая Россия» партин таңһчин әңгин ахлач, Элст балһсна Хургин депутат Наталья Зинченко, коррупциг гетлҗ, олна әәмшг уга бәәлһнд тусан күрглһнә төрәр үүлддг комитетин заллтын һардач Шакир Абдулмуслимов, таңһчин Олна палатын ахлачин дарук Елена Крылова, таңһчин Улсин Хуралын (Парламентин) депутат Пүрбән Олег, күүнә зөв харслһна күцц зөвтә элчин бүрдәцин ахлач Мучан Эрнцн ирлцңгү керг-үүлдврт орлцв.
Күн болһна орулсн төр оньгт авч хәләгдв. «Мана парть 20 җилин өөнән темдглв, тер ончта йовдлла цуг үүрмүдән йөрәҗәнәв. Әрәсә күчтә орн-нутгт болтха, олн-әмтн сән-сәәхн бәәхин төлә шунҗанавидн. Һоллгчдан әмтн ЖКХ-н, хаалһин, усна сурвлҗ тосхлһна төрмүд босхад һундлан медүлв. Йириндән болхла, балһсна болн райодын әмтн мана партин герт ирҗ, төрән хаһлҗ чадҗана, юристин дөң күрггднә», - гиҗ партин таңһчин әңгин ахлач Наталья Зинченко келв.
Энүнә келсәр, цуг төрмүдиг эдн хаһлхар зүткнә. Үлгүрнь, партин төвин өөр бичкдүдин талвңд хумха урһа модд харш болҗала, әмтнә сурврар тер моддыг көрәдсн болв.
Тер мет Элстин нег уульнц күртл хаалһ тосхтн гиҗ балһсна суңһачнр ирсинь Наталья Николаевнаг бас тоод авв. Тер мет цергә шишлң керг-үүлдврт орлцачнрт дөң күрглһнә төр хаһлгдна. Мана баатрмудт арһ-чадсарн нөкд болнавидн, цааранднь чигн эн көдлмшиг күцәхвидн, гиҗ һардач заав.
Тиим кевәр «Справедливая Россия» партин элчнр эврә суңһачнртан дөңгән күргхдән кезә чигн белн бәәнә, нам демин кемҗәһән өргҗүләд чигн йовна.
ТҮРВӘН Һуна

Видео