Ут наста болхин төлә

Сегодня, 14:39 | Общество, Таңһчин зәңгс, Зіњг

Бурхна бәәшңд ирҗ мөргтн, Дрепунг Гоманг хурлас гелңгүд ирҗ, Бурхн Багшин Алтн сүмд мандл босхҗахин тускар урднь зәңглсн биләвидн. Гелңгүдин урн һара өңгтә элснәс кегдсн мандл ода цуг улсин оньгт тусхагдҗана. Цуг тоотнь номин йосар күцәгдҗ Амитаюс бурхна сәәхн бәәшң дүңгәҗ босв. Мандлмудыг талданар келхләрн, бурхдын сәәхн бәәшңгүд гиҗ нерәднә.
Хальмгин төв хурлын мөргүлин бәәрнд ут нас зүүлһнд туслдг Амитаюс бурхнд нерәдсн мандл босхв. Кесг хонгин туршарт ном умшгдҗ күцәгдсн әрүн чинртә эн үүдәлт әмтнә нүднә хуҗр хаңһаҗана. Мандл эклҗ тосхгдснас авн әмтн нааран ирҗ мөргәд, седкләрн төвкнәд, номд орҗав.
Мандл босхгдҗ төгссн цагла ном умшгдҗ, шаҗна шишлң йосрхл күцәгдв. Гүн чинртә сәәхн бәәшңгиг ном умшҗ әрүслв. Энүнә төлә тосхсн мандлд – өңгтә сәәхн бәәшңгән эзлҗ автха гисн үрвртәһәр мөргүл кегдв.
Бурхн Багшин Алтн сүмд ирәд, хойр долан хонгин туршарт Амитаюс бурхна бәәшңд зальврх таал учрҗана. Гелңгүдин келсәр, хурлд ирәд, седкләрн төвкнәд, зальврад, мандлыг эргхлә терүнә туснь ик болна. Ут нас наслх хөв заядг Амитаюс бурхна әдст күртхин төлә Бурхн Багшин Алтн сүмд үкр сарин 15 күртл ирҗ үзтн. Эн өдр мөргүл кегдҗ, мандл цуцлгдсна дару урсхлд орулгдхмн.
УШКАНА Сувсн

Видео