УДЕ-н эв-арһнь өргҗәд бәәхмн

Сегодня, 12:35 | Общество, Таңһчин зәңгс, Зіњг

Элстин 23-ч тойгта сурһуль түрүн хальмг академик Эрднин Пүрвән нер зүүнә. Терүнә үүдәсн УДЕ эв-арһиг энд көдлҗәдг багшнр өргнәр олзлна. Одахн академикин 105 җилин өөнд нерәдҗ энд УДЕ- д нерәдсн умшлһн болв. Эн керг-үүлдврт балһсна сурһулин бүрдәцсин элчнр орлцв. Тер эв-арһиг ода Әрәсән кесг регионмудт, һазадын нутгудт бас өргнәр олзлҗахнь темдгтә. Терүгәр ул кеҗ әдл учр-утхта, өөрхн чинртә кесг тоотыг хамцулҗ дасч болҗана, тегәд чигн эн эв-арһиг кесг кичәлин багшнр сурһульчнрин медрлинь өргҗүлҗ, гүүдүлҗ олзлна.
УДЕ-н дөңгәр ахр болзгт шин тоот амрар дасч болҗана.Терүнә тускар Хальмг ик сурһулин профессор Дәкин Раиса тодрхаһар келҗ өгв. Академик Эрднин Пүрвән бәәдл-җирһл цуг сурһульчнрт болн теднә багшнрт сән үлгүр болна. Догшн дәәнә һалвд күнд шав авад, терүнә хөөн тууврин күчр-күнд таалд туссн бийнь, зовлңдан даргдлго, 1945 җилд Барнаулын багшин ик сурһульд орна. Тенд Ленинградын номтнрас гүн медрл хоршаҗ, эврә УДЕ-н эв-арһин ул тогтаҗ, Москвад аспирантурт сурна. Хальмг улс тууврт бәәсн цагла тиигҗ юмнас әәлго эврә кергән күцәдг күүнә үлгүр ик омгта болдгнь лавта. Дәәнә аврлт уга һалвд академикин заң-бәрцнь чигн батрад, күслдән яһад болв чигн күрдгиг дасч авснь лавта. Аспирантуран төгсәснә хөөн Пүрвә Мучкаевич Сарпулин багшин күрәлңд көдлдг болв. Хөөннь Элстд 1964 җилд Хальмг багшин күрәлң секгдснә дару төрскн һазртан нүүҗ ирәд физикин болн эсвин дацңд багшлв, 1970 җиләс авн Хальмг ик сурһульд кесг арвад җилдән көдлв. 1989 җилд нертә номтд академикин цол зүүлһсн болдг.
Академикин бәәдл-җирһлин тускар Пүрвә Мучкаевичин көвүнь, профессор Эрднин Баатр, 23-ч тойгта сурһулин һардач Саңһҗин Полина келҗ өгв. УДЕ-н эв-арһ эндр иргчдән чигн кергтә болх гиҗ Хальмг нефтин болн газин колледжин эсвин багш Мамута Людмила бас келнә. Хальмг ик сурһулин профессор Полина Васильева УДЕ-н медрлиг амрар хамцуллһна эв-арһ гиҗ эврә илдклдән темдглв.
Эндр Элстин сурһульмудт УДЕ-н эв-арһ өргнәр олзлгдҗахин тускар кесг багшнр келәд, эврә дамшлтарн хувалцҗ цәәлһв. Тиим кевәр ик туста ховр эв-арһ сурһульчнрт медрлән амрар дасч авхд туслна. Иргчдән, йосн биш ухан цәәлһвр өгдг цагла чигн түрүн хальмг академикин үүдәсн эв-арһ улм өргнәр олзлгдх гиҗ лавтаһар келҗ болхмн.
ТҮРВӘН Һуна

Видео