Эрмдгтә бичкдүдт белгән бәрүлв

Шидр Санҗин Николайин нертә сойлын делгрлтин Төвд байрта керг-үүлдвр болв. «ЛУКОЙЛ» компаня буйнч седклин саң эрмдгтә бичкдүдт өдгә цага терг белглв. Хальмг Таңһчин залврин Ахлач Босхмҗин Гилән, буйнч саңгин һардач Игорь Бекетов, таңһчин социальн делгрлтин, күч-көлснә болн көдлмшәр тетклһнә министр Нахошкинә Мингиян харһлтд орлцв.
«ЛУКОЙЛ» компань үүлдҗәдг регионмудт буйнч седклин керг-үүлдврмүд давулад, балһсдт болн селәдт сән кец-таал тогталһна, бичкдүдт дөң күрглһнә көтлврмүд күцәдгиг таңһчин залврин Ахлач Босхмҗин Гилән темдглв. Эрмдгтә күүкд сурһуль сурч, билг-эрдмән делгрүлҗ, театрт одад, цаган сергмҗтәһәр давулҗ чадхин төлә иим арһ өгчәхинь буйнч седклин саңгин һардач Игорь Бекетовин нернд «ЛУКОЙЛ» компаня һардврт ханлтан өргв.
Игорь Бекетовин келсәр, эдн йисн җилин эргцд 16 регионд буйнч седклин керг давулад, эрмдгтә бичкдүдт 460 терг белглв. Тер тоод мана таңһчд 24 күүкн-көвүн өдгә цага тергтә болв. «Гемтә-шалтгта бичкдүдин эк-эцкнр, олна бүрдәцин элчнр дөң-нөкд болхиг сурна. Күн болһна төрт орлцҗ, бичкдүдт сән таал тогтахар бидн шуннавидн. Тиигчкәд, күн болһна онц неквринь учртан авад, залхд амр болх өдгә цага терг хулдҗ авнавидн. Эндр дәкәд 12 күүкн-көвүнд бидн дөңгән күргвидн. Таңһчин залвр мана төсвиг дөңнҗәхнь эн олнд кергтә болн чинртә керг болҗахиг иткүлҗәнә. Таңһчин гемтә-шалтгта бичкдүдин реабилитацин төв маднд дөң болснд бас ханлтан өргҗәнәвидн. Эдн эрмдгтә бичкдүдиг йилһҗ авад, кенд ямаран терг кергтә болҗахиг диглҗ ик көдлмш кев», - гиҗ Игорь Бекетов келв.
Таңһчин социальн делгрлтин министр Нахошкинә Мингиян «ЛУКОЙЛ» компаня үүлдвриг бас темдгләд, одахн эдн чикнь хату бичкдүдт шишлң кергсл бәрүлҗ өгсиг тодлв. Эн өдр һаза бүр-бүр гисн хур орв, тегәд хальмг авъясар эннь сән йорта болдгиг келәд, буйнч седклин саңгин һардач Игорь Бекетовд Ханлтын бичг бәрүлҗ өгв.
Бичкдүдин эк-эцкнр эднә күүкдт өдгә цага терг белглснд бас ханлтан өргәд, ода эднә үрд һаза һарад цевр аһар киилҗ сурһульд одад, үүрмүдтәһән харһҗ чадх гиҗ келв. Нег үлү селән һазрт бәәдг бичкдүдт амрар залдг тергн йир тааста болхмн. Харһлтын чилгчәр бичкдүдиг шикр-балтаһар тоов.
ДООҖАН Наталья




















Республиканская газета, издающаяся на калмыцком и русском языках. Газета освещает общественно-политические события, происходящие в Калмыкии, а также публикует материалы по культуре и языку калмыков.