Хальмг Таңһчин Толһач Хаска Бату «Динамо» шинрүлгдсн спортын бәәр ирҗ хәләв. Тенд шишлң кергсл углҗ тәвгдв. Эндр болхла спортсменмүдт сән таалд дамшҗ болҗана.

Эн җилин бар сард КТК-Р бүрдәц 30 җилин өөнән темдглхмн. Һучн җилмүдин эргцд орн-нутгин регионмудыг, тер тоод Хальмг Таңһчиг олн халхар дөңнәд йовна.

«Баатрмудын цаг» шаңһа көтлврин һурвдгч девсңд орлцхар седҗәдг улсин төлә эрлһ оруллһна керг-үүлдвр эклв. Төрскән харсад, хәрҗ ирсн зөргтә дәәчнр дамшлтан олзлад, олн халхар көдлҗ чадҗана. Энүнд ик сурһульд эс сурсн улс чигн орлцад, кергтә медрл авч, цаарандан йосна, муниципальн болн талдан бүрдәцст көдлҗ чадхмн.

Хальмг Таңһчин Басңга Баатрин нертә Келн-улсин драмин театр 90 җилин өөнән темдглв. Таңһчин сойлын җирһлд һол орман эзлҗәдг театрт «академическ» гидг күндтә цол зүүлһгдв. Хальмгин театриг йөрәхәр Әрәсән кесг регионас болн һазадын ордудас театрин үүлдәчнр ирв.

Шидр Әрәсән Залврин Ахлачин дарук Марат Хуснуллинә һардврт орн-нутгин Залврин комиссин штабин сүүр болв. «Җирһлин таал ясруллһн» гидг келн-улсин төсв, орн-нутгин болн региона көтлврмүд күцәлһнә төрмүд терүнд хәләгдв. Хальмг Таңһчин Толһач Хаска Бату тер сүүрт бас орлцв.

Хальмг Таңһчин Толһач Хаска Бату таңһчин дотр-дундын кергүдин министр Дмитрий Григорьевла болн таңһчд үүлддг Әрәсән ФСБ-н заллтын һардач Дмитрий Докийчукла харһв. Таңһчд әәмшг уга бәәдл тетклһнә, тер тоод таңһчин йосна, МВД-н болн УФСБ-н бүрдәцс бачм цагт хамцу үүлдхин тускар харһлтд күүндвр болв.
- Хальмгин болн цуг әмтнә әәмшг уга бәәдл таңһчин дигтә-дарата делгрлтд туслдгиг бидн цуһар сәәнәр медҗәнәвидн. Көдлмшән ик даавртаһар күцәҗәдг төләднь күчн-чидлин бүрдәцсин һардачнрт болн көдләчнрт ханлтан өргҗәнәв. Мана ниицлт болн хамцу үүлдвр Хальмгин болн Әрәсән цецгәрлтд туслтха, - гиҗ таңһчин Толһач темдглв.

Таңһчин Толһач Хаска Бату дер кедг MeComfo болн өлг-эдин «Интерстрой» бүрдәцст одв. MeComfo бүрдәсн арһлач Максим Проноза дер кеҗ һарһдг бүрдәцин үүлдврин тускар келҗ өгәд, эднә эд-тавр хулдачнр дунд ик тааслт олсиг заав. Келхд, эднә кегдлмүдиг ниигмин сүлҗәнә эв-арһар хулдҗ авч болхмн гиҗ эн келв. Бүрдәцин көдләчнр дер келһнә йовудыг үзүләд, терүг хулдхд белдҗ эд-бод кев.

Давсн долан хонгт мана таңһчур Тыва Республикин Камбы Лам Лоден Шераб залрҗ ирв. Хальмг Таңһчин Толһач Хаска Бату күндтә гиичлә харһад, мана улсин хоорнд батлгдсн ах-дүүнрин залһлдана тускар күүндв. Хальмгин Шаҗн Лам гевш Тензин Чойдак эн харһлтд бас орцлв.

Хальмг Таңһчин Толһач Хаска Бату Херсонск мүҗин Алешек балһсна әмтнд дөң күрглһнә керг-үүлдврин йовудыг оньгтан бәрснә тускар зәңглв. Тенд бәәдг әмтнд хот-хол, ус, нань чигн кергтә тоот күргҗ өглһнә, тендәс талдан һазрур нүүх санаһан медүлсн улсиг һарһҗ авлһна керг-үүлдвр цуг нарт-делкән әмтнә оньгт бәәсмн.

Бурхн Багшин Гегән 33 бурхдын таралңгин орнас бууҗ ирсн әрүн йовдлд нерәдсн байрин өдр Хальмгт темдглгдв. Эн җил шаҗна байр үкр сарин 1-лә ирлцв. Таңһчин әмтн цаһан седклтәһәр кергүдән тодлад, өр-өвч үүлдврән улм делгрүлҗ, цуг әмтн эвин таалд амулң-менд бәәхин төлә зальврв.