Көлгн-күчнә предприять бүрдәгдв

24-05-2020, 13:50 | Таңһчин зәңгс » Эндрк ґдрин тґрір

Элст балһснд көлгн-күчнә шин предприять бүрдәгдҗәхин тускар мана газет урднь зәңглсн билә. Одахн таңһчин хотл балһсна администрацин һардач Дмитрий Трапезников шин бүрдсн «Элиста ГорТранс» гидг муниципальн предприятин көдлмшин төрмүдин тускар селвлцә һардҗ давулв. Керг-үүлдврт Элст балһсна администрацин толһачин дарукс Баатр Эрднеев болн Виктория Эрднеева, тер мет «Элиста ГорТранс» предприятин һардач Сергей Камолов орлцв.
«ИПА» шаңһа учрежденя көлгн-күчн күцц кевәр балһсна предприятин медлд орулҗ өггдв гиҗ Элстин администрацин толһачин дарук Баатр Эрднеев селвлцәнә йовудт зәңглв. Тер мет ИПА-н көдләчнр балһсна шин предприятьд ирҗ көдлхмн. Ода эн туст кергтә цаасинь бичҗ белдҗәнә.
Селвлцәнә йовудт балһсар әмтиг зөөх көлгн-күчнә маршрутмудын диг-даран темдглгдв. Автобусмудын ясврин, терүг тетклһнә болн нань чигн техническ төрмүдт онц оньг тусхагдв. Тер мет көлгн-күчнә предприятин делгрүллһнә төрәр сүв-селвгүд орулгдв.
Хальдврта гем түглһиг хөрлһнә керг-үүлдврмүд төгсәд, әмтнд саалтг угаһар йовдг зөвшәд өгснә хөөн балһснд олна көлгн-күчн экләд көдлхмн. Түрүн авгтан 18 автобус, тер тоод 7 «ЛиАЗ» болн 11 «ПАЗ» тамһта автобусмуд әмтиг зөөх. Даруһас олна көлгнә тооһинь икдүлх саната, ут тоодан 50 автобус балһсна маршрутмудар йовулхар зуралҗана. Тиим автобусмудт әмтн шахлдан угаһар, нег-негнүрн өөрдлго йовҗ чадхмн.
Балһсна маршрутмудт көдлх муниципальн көлгн-күчнә көдлмшин диг-дараг бәәрн әмтнә неквринь төртән авч, ухалҗ батлсмн. Муниципальн олна көлгн өрүн 6 часас авн көдлмшән эклҗ,, сөөни 22 час күртл балһсна маршрутмудар йовҗ, әмтиг зөөхмн. Кемр нег маршрутар йовхин төлә 40-50 минут керглгддг болхла, тер маршрутар автобусмуд даран-дарандан 20 минутын эргцд йовад бәәхмн. Көдлмштән һарчах җолач эрк биш эмчин хәләврт орхмн. Терүнә төлә шишлң зөвшәл авсн эмнүллһнә хорас көдлхмн.
Муниципальн көлгн-күчнә предприять бүрдәлһнә кергт баһ биш мөңгн һарһгдсмн. Тер бийнь автобуст йовлһна туслмҗин үн өөдлшго. Элстин администрацин һардвр әмтиг зөөлһнә төлә авдг мөңгнә кемҗәг икдүлхәр седҗәхш, Тер мет олна көлгн-күчнд әмтнә төлә таалмҗта болн әәмшг уга таал тогталһиг бүрткәд бәәхмн.

АРЗАН Маргарита

Көлгн-күчнә предприять бүрдәгдв























#АдминистрацияЭлисты #ПассажирскиеПеревозки #АвтобусныйПарк #ЭлистаГорТранс

Видео