Элстүр ордг хаалһд стел ясҗ шинрүлхмн

28-05-2020, 15:09 | Таңһчин зәңгс » Эндрк ґдрин тґрір

Хальмг Таңһчин Толһач Бату Хасиков өгсн даалһврар Элстүр ордг хаалһст хотл балһсна нерәдлһинь зааҗ темдглҗәх стелмүдиг ясҗ шинрүллһнә көдлмш кегдҗәнә. Эннь орта гиҗ сангдна, тер юңгад гихлә таңһчд эн җил ончта өөнмүдәр байн болҗана. Хальмг автономь бүрдснә 100 җилин өөн, Элст балһсна 155 җилин өөн темдглгдхмн. Тегәд чигн байрин керг-үүлдврмүдт орлцхар орн-нутгин кесг балһсдас таңһчур олн гиичнр ирхнь маһд уга.
Элст балһсна администрацин барин цергллтин зәңглсәр, одахн Дмитрий Трапезников дааврта көдләчнрлә хамдан Сарпулин талас Элстүр ордг хаалһд бәәх стел шинҗлҗ хәләв. Эн архитектурн тоот хуучрҗ, үзмҗ уга бәәдлтә болҗ одсмн. Советин цагт кеерүләд кесн мозаик эвдрҗ одҗ. Бетонар кесн кесн ул-сүүринь хамхрҗ унҗана. Тер мет стелд «Элиста» гидг бичсн үгин үзгүдинь чигн мууһар үзгддг болҗ. Эн стел 1987 җиләс авн капитальн кевәр ясгдад уга гиҗ тедглх кергтә.
Элст балһсна администрацин һардач урдаснь эн архитектурн тосхлтын ясврин көдлмш келһнә кергт кедү мөңгн керглгдхиг тоолад һарһҗ авхиг эрдмчнрт даалһсн билә. Эн конструкциг хойр әңгд хувах шиидвр авгдсмн. Нег таласнь урдк кев-янзинь хадһлҗ, шинәс сергәҗ, мозаичн эрәһинь тер кевәрнь кеҗ шинрүлхмн. Хойрдгч таласнь хотл балһсна нерәдлһинь медүлҗәх үгин ик үзгүд кегдхмн. Тер мет стелин ора деернь Элстин сүлд кеҗ үзүлхмн.
Стелин эргндк һазрт плитк делгх, усн хурдгиг хөрлһнә систем ухалҗ тәвх, бордюрмуд тосхх кергтә гиҗ Дмитрий Трапезников тиим даалһвр эрдмчнрт өгв. Удлго һаза йосндан дуларад ирхлә, даруһас талдан үзг талас хотл балһснур ордг хаалһст Элстиг темдгллһнә стелмүдин ясврин көдлмш экләд кегдхмн.

АРЗАН Маргарита

Элстүр ордг хаалһд стел ясҗ шинрүлхмн
Элстүр ордг хаалһд стел ясҗ шинрүлхмн

Видео