Хаалһст әәмшг уга бәәдл тогтахин төләд

02-06-2020, 14:46 | Таңһчин зәңгс » Эндрк ґдрин тґрір

2020 җилд «Әәмшг уга болн сән чинртә көлгн-күчнә хаалһс» гидг келн-улсин төсвин йовудт Әрәсән 83 регионд сурһуль-эрдмин болн сул цаган давулҗ амрлһна учрежденьс тал ордг 1327 дууна хаалһсин бәәдлинь ясрулхмн. Энтн 826 хаалһ, ясгдҗах хаалһсин ик зунь шин сурһулин җил эклтл эдлврт орулгдх.
Хаалһин җисәнә әәмшг уга бәәдлиг өөдлүллһн энтн келн-улсин һол күсл, тегәд чигн эн төрт онц оньг тусхана. Йовһн улс хаалһ һатлһна ормсин кец-таалнь ясрулна, светоформуд тәвнә, әәмшгтә ормст хаалһиг халхлҗах хашас тәвнә, сурһулин болн әмтн амрлһна учрежденьсин өөр хаалһин темдгүд углҗ тәвнә. Орн-нутгин цуг регионмудт иим көдлмш кегднә.
Олна элчнрин орлцлһтаһар ясвр кегдх обьектсин диг-даран батлгдна. Эрк биш олна ухан-тоолвриг учртан авна, тер юңгад гихлә келн-улсин төсвин һол күслнь энтн әмтнә бәәдл-җирһлин чинринь өөдлүллһн мөн. Тегәд чигн хаалһин ясврин программд хамгин түрүнд социальн объектс, тер дотр сурһулин учрежденьс тал ордг балһсна болн региональн хаалһсиг орулсмн. Эн хаалһс бичкдүдин болн эк-эцкнрин төлә таалмҗта болн әәмшг уга болх зөвтә.
Таңһчин хотл балһснд хаалһин җисәнә әәмшг уга бәәдлиг өөдлүллһнә төрт Элстин администрац онц оньган тусхана. «Әәмшг уга болн сән чинртә көлгн-күчнә хаалһс» гидг келн-улсин төсвин күцәлһнә йовудт эн зунар Элстин хаалһст 27580 дөрвлҗн метр тротуар кехмн, 449 хаалһин темдг тәвхмн болн йовһн улс хаалһ һатлһна ормст 2090 метрт хашас тәвгдх.
Сурһулин объектс тал ордг хаалһсин кец-таалынь ясруллһна керг хотл балһсна администрацин бүртклһнд бәәнә. Хаалһин ясврин көдлмш келһнә зура батлсмн. Эн зурала ирлцәтәһәр көдлмш кегднә. Эннь йовһн улс хаалһ һатлһна ормин кец-таалынь ясрулна, светоформуд тәвнә, хашас тәвнә, докъя өгдг темдгүд тәвгднә.
Келхд, Волгоградск уульнцд сурһуль-эрдмин хойр объект бәәнә. Эннь 27-ч тойгта «Теремок» бичкдүдин сад болн 23-ч тойгта дундын школ бәәршлнә. Тиигәрән ордг хаалһд ясвр кегдх. Ут тоодан 480 метрт хаалһин девскр ясгдҗ шинрүлгдхмн. Хомутниковин нертә уульнцас Ленинә уульнц күртл 628 метр хаалһин участк ясчана. Эннь 2-ч тойгта дундын школ ордг хаалһин бәәдлиг ясрулҗана. Хомутниковин уульнцд 1880 метр шин хаалһ тосхгдх. Энд 8-ч тойгта «Светлячок» бичкдүдин сад болн 8-ч тойгта дундын школ бәәнә.
8 Мартын уульнцд нефтин болн газин государственн колледж тал 1123 метр хаалһин участкд ясврин көдлмш кеҗәнә. Тер мет Волковин уульнцас эн сурһулин учреждень тал ордг 316 метрт хаалһин участкиг ясчана.
Северо-Западн уульнцт бәәдг 32-ч тойгта бичкдүдн тал ордг 1015 метр шин хаалһ тосхҗана. Веткалован уульнцд 3-ч тойгта «Ягодка» бичкдүдин сад тал ордг хаалһиг ясрулҗана. Энд 1448 метр участкиг ясчана.
«Әәмшг уга болн сән чинртә көлгн-күчнә хаалһс» гидг келн-улсин төсв 2024 җил күртл бәәдл-җирһлд тохрагдхмн. Зурһан җилин эргцд нормативн некврлә ирлцҗәх региональн хаалһсин үзмҗ 43,1 процентас 50,9 процентд өөдлхмн, балһсна болн өөр-шидрк селәдин шинрүлсн хаалһсин үзмҗ 42 процентас 85 процентд өсхмн. Зеткртә йодвлмуд учрдг хаалһсин әәмшгтә участксин то хойр холванд баһрулх саната. 2017 җилин үзмҗәс дорхнь хаалһсд учрсн зектртә йовдлмудас көлтә әмтн хорлһн 3,5 холванд баһрх гиҗ тааҗана.

АРЗАН Маргарита

Хаалһст әәмшг уга бәәдл тогтахин төләд





















#БКАД #ДорогиРеспубликиКалмыкия #БКАД_08 #Калмыкия

Видео