Хотл балһсн өсч-өргҗх

04-06-2020, 12:34 | Таңһчин зәңгс » Эндрк ґдрин тґрір

Элстин администрацин һардач Дмитрий Трапезников балһсна ах архитектор Сергей Шалаевла давулсн көдлмшч селвлцәнә йовудт таңһчин хотл балһсна иргчин делгрлтин, шин микрорайодын, школмудын болн бичкдүдин садмудын тосхлтын туск төрмүдәр күүндв.
Элст балһсн үүлдҗәх һоллгч зура арвн җил хооран батлгдсн билә. Терүнәс нааран кесг хүврлт учрсмн. Давсн җилд Дмитрий Трапезников балһсна иргчин делгрлтиг учрт авч, энүнлә ирлцүлҗ һоллгч зураг шинрүлх даалһвр өгсн билә.
Эндр өдр балһсна округ хойр хүвәс тогтна. Эннь Элстин һазр болн балһсна өөр-шидр бәәх һазр, энтн Салын, Аршан болн Максимовка селәд. Балһсн 2100 гектар һазр эзлҗәнә, эднәснь 5244 гектар һазрт гермүд тосхгдсн бәәнә.
1960 җилмүдт балһсна цутхлңд, 1-ч, 3-ч болн 4-ч микрорайодт олн давхр гермүд экләд тосхгдсмн. Хөөннь Элстин дорд үзгт гер-бүүрин тосхлт делгрв. Сүл арвн җилин эргцд балһсна 9-ч болн 10-ч микрорайодт олн давхр гермүд тосхгдв, тер мет хотл балһсна барун үзгт чигн олн гермүд босхгдв.
Зуг «Молодежный» микрорайонд гер-бүүрин тосхлт делгрҗәхш. Өдгә цагт энд чинртә социальн объектс тосххар зуралҗана. Олн давхр гермүд, 800 зәәтә школ болн 240 зәәтә бичкдүдин сад энд тосхгдх. Тер мет «Молодежный» микрорайонд инвестиционн төсвс тохрах күслтә. Көлгн-күчнә вокзал, хулд-гүүлгәнә төв, көлгн-күч яслһна салон, көлгн-күчнә зогсалта гүртм базр энд бүрдәхәр бәәнә.
Балһсна өмн-дорд үзгт 50 гектар һазрт ик чигн шин микрорайон тосхх зурата. Энд бас шин школ, бичкдүдин сад, талвңгуд болн лавкс тосхх саната.
Өдгә цагт Элстин администрац сольврмуд орулҗ, балһсна һоллгч зураг ухалҗ белдлһнә туст ирлцңгү тогтавр һарһв. «Олн җилмүдин туршарт Элстд әмтн зокалмудыг болн некврмүдиг күцәлго гермүд тосхҗасмн. Дааврта үүл дааҗасн улс кергән салңгар күцәҗәснә ашт балһс тосхлһна зокалмуд эвдсн йовдлмуд үзҗ болхмн. Гүр-бүүр тосхх зөв уга һазрт гермүд тосхгдсмн. Эннь харлһна һазрт, урһа модд урһҗасн һазрт гер-бүүр тосхгдсн болдг. Балһсна әмтнә то иргчдән икдхиг учртан авч, объектсин тосхлтыг урдаснь оньган өгч зуралх кергтә. Элстиг йоста кевәр өдгә цагин ке-сәәхн болн таалмҗта балһснд хүврүлх күсл тәвгдҗәнә. Эндр өдр шин технологийс олзлҗ, соньн кевәр болн сән чинртәһәр эн зөрүллтин керг-төриг күцәх арһ бәәнә», - гиҗ Дмитрий Трапезников темдглв. Таңһчин хотл балһсна 3D кев-янзиг тогтах күсл тәвгдв.

АРЗАН Маргарита

Видео